खेड-जगबुडी नदी इशारा पातळीवर

जगबुडी नदी इशारा पातळीवर
खेडमध्ये जनजीवन विस्कळित : शहराला पुराचा धोका
खेड, ता. ७ : खेड तालुक्यात गेल्या दोन दिवसांपासून सुरू असलेल्या पावसाने रविवारी दुपारनंतर कहर केला. त्यामुळे जनजीवन विस्कळित झाले. जगबुडी नदी ५.३० मीटर ही इशारा पातळीवरून वाहू लागली आहे. त्यामुळे शहरात पाणी घुसण्याची शक्यता आहे.
दोन दिवसांपासून कोसळत असलेल्या पावसाचा जोर रविवारी सकाळपासून वाढला. शहरासह तालुक्याला पावसाने झोडपून काढले. नारिंगी, चोरद व जगबुडी नदी पात्रातील पाण्याची पातळी वाढली आहे. जगबुडी नदीने सकाळीच १० वाजण्याच्या सुमारास इशारा पातळी ओलांडली. त्यामुळे पाणी वाढून शहरात शिरण्याचा धोका कायम आहे.
हवामान विभागाने अतिमुसळधार पावसाचा इशारा दिल्याने येथील प्रशासन अलर्ट मोडवर असून नदीकाठच्या गावांना तसेच शहरातील नागरिक व व्यापाऱ्यांना सतर्क राहण्याच्या सूचना देण्यात आल्या आहेत. सायंकाळी उशिरापर्यंत पावसाचा जोर कायम होता. त्यामुळे पूरसदृश्य स्थिती निर्माण होण्याची शक्यता आहे. पावसामुळे मुंबई - गोवा महामार्गावरील वाहतूक धिम्या गतीने सुरू आहे. महामार्गावरील भरणे नाका येथील गटारांचे काम अर्धवट असल्याने आणि भरणे नाक्यावरील रस्त्यावर पडलेल्या खड्ड्यातून आणि पावसाच्या पाण्यातून मार्ग काढताना वाहन चालकांना कसरत करावी लागत होती.