आपटीत विद्यार्थ्यांनी घेतली सीईओ पुजार यांची मुलाखत

95500

विद्यार्थ्यांनी घेतली ‘सीईओं’ची मुलाखत

आपटी शाळेचा उपक्रम; विविध प्रश्नांना दिली उत्तरे

सकाळ वृत्तसेवा

गावतळे, ता. ८ ः दापोली तालुक्यातील आपटी प्राथमिक शाळेला जिल्हा परिषदे मुख्य कार्यकारी अधिकारी कीर्तीकिरण पुजार यांनी भेट दिली. या भेटीवेळी लहान मुलांनी सीईओंची मुलाखत घेतली.
गटशिक्षणाधिकारी बळवंतराव यांनी दापोली तालुक्याच्या व्हिजन कार्यक्रमाविषयी व व्हिजन दापोली कार्यक्रमामुळे विद्यार्थ्यांच्या गुणवत्तेत होत असलेला सकारात्मक बदल याविषयी सीईओ पुजार यांना माहिती दिली होती. त्यातीलच एक उपक्रम म्हणजे मुलाखत असून त्यासाठी वेळ द्यावा, अशी विनंती केली होती. त्यांच्या अनुमतीने आपटी शाळेच्या चिमुकल्यांनी त्यांची मुलाखत घेतली. यावेळी त्यांचे बालपण, शिक्षण, आवडते शिक्षक, छंद, खेळ याविषयी मुलांनी प्रश्न विचारले.
श्री. पुजार यांनीही अतिशय सुंदर प्रतिसाद देऊन विद्यार्थ्यांच्या सर्व प्रश्नांची उत्तरे दिली. त्यानंतर श्री. पुजार यांनीही मुलांना प्रश्न विचारले. त्याची उत्तरे मुलांनी दिली. या वेळी गटविकास अधिकारी गणेश मंडलिक, सहाय्यक गटविकास अधिकारी सुनील खरात, गटशिक्षणाधिकारी अण्णासाहेब बळवंतराव, कृषी अधिकारी श्रीमती रेवाळे, सरपंच संपदा आग्रे, टाळसुरे केंद्राचे केंद्रप्रमुख प्रवीण तांबे उपस्थित होते.