नडगिवे शाळेच्या विद्यार्थ्यांनी घेतला भात लावणीचा आनंद

९५९३४
नडगिवे शाळेच्या विद्यार्थ्यांनी
घेतला भात लावणीचा आनंद
सकाळ वृत्तसेवा
तळेरे, ता. ११ : ‘बांधावरची शाळा करूया, बांधावरची शाळा, हिरव्या हिरव्या हिरवाईचा, फुलवू शेतमळा’ असे गीत गुणगुणत जिल्हा परिषद पूर्ण प्राथमिक शाळा नडगिवे क्रमांक १ प्रशालेतील मुलांनी जिल्हा परिषद सिंधुदुर्गचा पर्यावरणाशी नाळ जोडणारा व शेतीतील कामांची ओळख शालेय विद्यार्थ्यांना करून देणारा नाविन्यपूर्ण असा ''बांधावरची शाळा'' उपक्रम आनंदमय, उत्साहापूर्ण वातावरणात केला. शाळा व्यवस्थापन समिती अध्यक्ष सतीश कर्ले, मुख्याध्यापिका अनिता पाटकर यांच्या मार्गदर्शनाखाली नडगिवे येथील शेतकरी अजित गुंडये यांच्या शेतात हा उपक्रम हा उपक्रम राबविला. अर्चिता गुंडये यांनी सर्वांचे स्वागत केले. तरवा काढणे, नांगरणी करणे, चिखल करणे, मेर बांधणे, पेंढी धुणे, लावणी करणे यांसारख्या विविध कामांचा प्रत्यक्ष अनुभव मुलांनी घेतला. गुंडये यांच्याशी शेतीसंबंधी संवाद साधला. शेतात उखाणी व गाणे गात मुलांनी बळिराजाला मदत केली. या उपक्रमात शिक्षक प्रभा अकिवाटे, संदीप कदम, श्रीम. कासले यांचे सहकार्य लाभले.