बिबट्या मृत्यू

96275

सोलगावजवळ आढळला
मृतावस्थेतील बिबट्या
राजापूर, ता. १० ः तालुक्यातील सोलगाव, देवीची गुरववाडी येथील वसंत नारायण गुरव यांच्या घराच्या बाहेर बिबट्या मृतावस्थेत आढळला. भूक न भागल्याने त्याचा मृत्यू झाला असावा, असा अंदाज वन विभागाकडून वर्तविण्यात आला आहे.
याबाबत वन विभागाने दिलेल्या माहितीनुसार, सोलगाव, देवीची गुरववाडी येथील वसंत गुरव मुंबईला वास्तव्यास असून त्यांचे घर बंदस्थितीत असते. आज दुपारी गुरव यांच्या घराशेजारी बिबट्या असल्याचे ग्रामस्थांच्या निदर्शनास आले. त्यांनी तत्काळ याबाबत वन विभागाला माहिती दिली. त्यानंतर वन विभागाचे अधिकारी घटनास्थळी दाखल झाले. मात्र घराबाहेर असलेला बिबट्या मृत असल्याचे त्यांच्या निदर्शनास आले. पशुवैद्यकीय अधिकाऱ्यांमार्फत बिबट्याची तपासणी करण्यात आली. मृत बिबट्या मादी असून ५ ते ६ महिने वयाचा असल्याचे वन विभागाकडून सांगण्यात आले. भूक न भागल्याने तो मृत झाल्याचा अंदाजही वन विभागाकडून वर्तविण्यात आला आहे. यावेळी रत्नागिरी परिक्षेत्र वनअधिकारी प्रकाश सुतार, राजापूर वनपाल जयराम बावदाणे, रत्नागिरी लेखापाल तानाजी पाटील, राजापूर वनरक्षक विक्रम कुंभार यांच्यासह अनिकेत मोरे, नीतेश गुरव आदी उपस्थित होते.