जिल्ह्यात आजपासून ‘महसूल पंधरवडा’

जिल्ह्यात आजपासून
‘महसूल पंधरवडा’

शासन योजनांबाबत जागृती मोहीम

सकाळ वृत्तसेवा
सिंधुदुर्गनगरी, ता. ३१ ः जिल्ह्यात महसूल विभागाचा ‘महसूल पंधरवडा’ १ ते १४ ऑगस्टदरम्यान साजरा करण्यात येणार आहे. महसूल विभागाकडून देण्यात येणाऱ्या सेवा आणि विभागांद्वारे राबविण्यात येणाऱ्या विविध योजनांबाबत नागरिकांना अधिकाधिक माहिती प्राप्त होऊन त्यांना योग्य लाभ घेता यावा, तसेच त्याबाबत नागरिकांमध्ये जागरुकता वाढावी, शासनाबद्दल आणि शासनाच्या कामकाजाबद्दल नागरिकांचा विश्वास वृद्धिंगत व्हावा, यासाठी विशेष मोहीम व लोकाभिमुख उपक्रम राबविण्याच्या उद्देशाने ‘महसूल पंधरवडा’ साजरा करण्यात येणार असल्याचे जिल्हाधिकारी किशोर तावडे यांनी सांगितले.
जिल्ह्यामध्ये महसूल पंधरवडा यशस्‍वीरीत्‍या राबविण्यासाठी कार्यक्रमांचे नियोजन केले आहे. त्‍यासाठी संबंधित अधिकाऱ्यांची नियुक्‍तीही केली आहे. तालुकास्‍तरीय कार्यक्रम प्रत्‍येक तहसीलस्‍तरावर होणार आहेत. या उपक्रमात उद्या (ता. १) ‘महसूल दिन’ साजरा करणे व महसूल सप्‍ताह प्रारंभ, ‘मुख्‍यमंत्री-माझी लाडकी बहीण’ योजना कार्यक्रमाचे स्वरूप, योजनेसाठी लागणारी कागदपत्रे उपलब्‍ध करून देण्‍यासाठी विविध दाखले, प्रमाणपत्र वितरित करणे, २ ऑगस्टला मुख्‍यमंत्री युवा कार्य प्रशिक्षण योजनेचा अधिकाधिक युवकांना लाभ देण्यासाठी विविध दाखल्‍यांसाठी शिबिरांचे आयोजन, ३ ला ‘मुख्‍यमंत्री तीर्थदर्शन योजना’ याअनुषंगाने ज्‍येष्‍ठ नागरिकांना तीर्थस्‍थळांना भेट देण्‍यासाठी नमूद केलेली कागदपत्रे उपलब्‍ध करून देण्‍यासाठी शिबिरे, ४ ला ‘स्‍वच्‍छ व सुंदर माझे कार्यालय’अंतर्गत कार्यालयामध्‍ये स्‍वच्‍छता मोहीम राबवून अभिलेख व दस्‍तऐवज यांचे वर्गीकरण व व्‍यवस्‍थापन, नोंदणीकरण, महत्त्‍वाच्‍या दस्‍ताऐवजांची फेरिस्‍त यादी तयार करणे, ५ ला ‘सैनिक हो, तुमच्‍यासाठी’ अंतर्गत संरक्षण दलातून निवृत्त अधिकारी, कर्मचाऱ्यांच्या घरासाठी, शेतीसाठी जमीन वाटपासंदर्भात कार्यवाही करणे, ‘महसूल’मार्फत देण्‍यात येणारे विविध दाखले, प्रमाणपत्र सैनिकांच्‍या कुटुंबीयांना वाटप करणे, जिल्‍हा सैनिक कल्‍याण अधिकारी कार्यालयात प्राप्‍त प्रलंबित प्रश्‍न निकाली काढणे, ६ ला ‘एक हात मदतीचा, दिव्‍यांगाच्‍या कल्‍याणाचा’ उपक्रमांतर्गत दिव्‍यांगांसाठी शासनातर्फे राबविण्‍यात येणाऱ्या विविध योजना, उपक्रमांबाबत माहिती देऊन त्‍यांना आवश्‍यक दाखल्यांसाठी शिबिरे, ७ ला कर्मचारी सेवापुस्‍तिका अद्ययावत करणे, प्रलंबित परिच्‍छेद निपटारा करणे, ८ ला फेरफार व प्रलंबित वाटप प्रकरणे, तसेच शिधापत्रिका वाटप करणे, ९ ला महाराष्‍ट्र जमीन महसूल अधिनियमानुसार दुरुस्‍त्‍या करण्यात येणार आहेत.
----
अन्य होणारी कामे अशी...
१० ऑगस्ट रोजी पाणंद रस्‍ते मोकळे करणे, स्‍मशानभूमी, दफनभूमी सर्व गावांमध्‍ये सुविधा देऊन त्‍याचा नकाशा व अधिकार अभिलेखात नोंद करणे, ११ ला शासकीय जमिनीवरील अतिक्रमण काढणे, शर्तभंग प्रकरणे शोधणे, १२ ला ई-पीक पाहणी, ई-हक्‍क, ई-चावडीबाबत कार्यवाही पूर्ण करणे, घोषणापत्र चार करणे, १३ ला कमी- जास्‍त पत्रके व अकृषिक सनद देणेबाबत, १४ ला महसूल संवर्गातील कार्यरत, निवृत्त, कर्मचारी संवाद, उत्‍कृष्‍ट अधिकारी-कर्मचारी पुरस्‍कार वितरणासह महसूल सप्‍ताहाचा सांगता समारंभ होणार आहे.