देवगड रोटरी क्लबतर्फे गुरुवारी चित्रकला स्पर्धा

देवगड रोटरी क्लबतर्फे
गुरुवारी चित्रकला स्पर्धा
देवगड, ता. ११ : येथील रोटरी क्लब ऑफ मँगो सिटीतर्फे स्वातंत्र्यदिनानिमित्त गुरुवारी (ता. १५) येथील शेठ म. ग. हायस्कूलमध्ये चित्रकला स्पर्धा आयोजित केली आहे. शालेय तीन गटांत आणि खुलागट अशा एकूण चार गटांत स्पर्धा होईल.
स्पर्धेतील पहिली ते चौथीच्या गटासाठी ‘कौलारू घर आणि नारळाची बाग’ असा विषय असून यातील पहिल्या तीन विजेत्यांना वस्तुरुपी बक्षिसे दिली जाणार आहेत. पाचवी ते सातवीच्या गटासाठी ‘पावसाळ्यातील भात लावणी’ असा विषय असून यातील पहिल्या तीन विजेत्यांना अनुक्रमे, ७००, ५००, ३०० रुपये रोख देण्यात येणार आहेत. आठवी ते दहावी गटासाठी ‘कोकणातील गणेशोत्सव’ असा विषय असून यातील पहिल्या तीन विजेत्यांना अनुक्रमे, १०००, ७००, ५०० रुपये रोख देण्यात येणार आहेत. खुल्या गटासाठी ‘कोकणी लोककला’ असा विषय असून यातील पहिल्या तीन विजेत्यांना अनुक्रमे, १५००, १०००, ७०० रुपये रोख देण्यात येतील. स्पर्धेची वेळ सकाळी १०.३० ते १२.३० अशी आहे. इच्छुकांनी मनस्वी घारे, दयानंद पाटील किंवा अनिल गांधी यांच्याशी संपर्क साधावा, असे आवाहन केले आहे.