स्वामी स्वरूपानंद पतसंस्थेची आजपासून ठेवयोजना

‘स्वरूपानंद पतसंस्थे’ची ठेवयोजना सुरू

अॅड. पटवर्धन ः दहा कोटींचे उद्दिष्ट

सकाळ वृत्तसेवा
रत्नागिरी, ता. ३: स्वामी स्वरूपानंद सहकारी पतसंस्थेच्या दसरा-दिवाळी ठेव योजनेचा प्रारंभ आज पासून झाला. या महिन्यात १० कोटींच्या ठेवी संकलित करण्याचे उद्दिष्ट समोर ठेवले आहे, अशी माहिती संस्थाध्यक्ष अॅड. दीपक पटवर्धन यांनी दिली.
संस्थेने ३२५ कोटींच्या ठेव संकलनाचा टप्पा पार केला आहे. १७ शाखांमध्ये ५० हजारच्या पुढे असलेल्या ठेव खात्यांमधून हा ठेवींचा टप्पा गाठला आहे. विश्वासार्हता, शिस्त, पारदर्शकता, उत्तम ग्राहकसेवा आणि सहकारतेचा दृष्टिकोन सर्वतोपरी ठेवून स्वामी स्वरूपानंद पतसंस्था काम करत आली आहे. त्यामुळे मोठा ग्राहकवर्ग संस्थेशी जोडला गेल्याचे अॅड. पटवर्धन म्हणाले.
पतसंस्थेने ४७ कोटींचा स्वनिधी, १४६ कोटींच्या उत्तम गुंतवणुका, ९९.३२ टक्के वसुली, २८ टक्के भांडवल पर्याप्तता, सातत्याने प्राप्त होणारा ''अ'' लेखापरीक्षण वर्ग कायम ठेवला आहे. ठेव योजनांमध्ये गुंतवणूक करून आकर्षक व सुरक्षित गुंतवणुकीचे लाभार्थी होण्यासाठी ठेव योजनांमध्ये सहभागी व्हावे, असे आवाहन अॅड. पटवर्धन यांनी केले आहे.
-------