आयएएस, आयपीएससाठी झोकून देऊन काम करा

स्पर्धा परीक्षेच्या अभ्यासात स्वतःला झोकून द्या

डॉ. नरेशचंद्र काठोळे ः ज्ञानदीपमध्ये कार्यशाळा

सकाळ वृत्तसेवा
खेड, ता. ३ ः आयएएस, आयपीएस तसेच कोणत्याही स्पर्धा परीक्षांमध्ये यशस्वी व्हायचे असेल तर स्वतःला अभ्यासामध्ये झोकून देणे गरजेचे आहे, असे प्रतिपादन मिशन आयएएस या संस्थेचे संचालक प्रा. डॉ. नरेशचंद्र काठोळे यांनी केले.
ज्ञानदीप शिक्षण प्रसारक मंडळ संचालित ज्ञानदीप महाविद्यालय मोरवंडे-बोरज येथे ‘मी आयएएस अधिकारी होणारच’ या विषयावर एकदिवसीय स्पर्धा परीक्षा मार्गदर्शन कार्यशाळेत ते बोलत होते. ज्ञानदीप महाविद्यालय विद्यार्थ्यांच्या सर्वांगीण विकासाबरोबरच भविष्यातील करिअरसंदर्भात मार्गदर्शन करण्यासाठी नेहमीच प्रयत्नशील असते. याचाच भाग म्हणून ज्ञानदीप महाविद्यालय व मिशन आयएएस यांच्या संयुक्त विद्यमाने ही कार्यशाळा आयोजित करण्यात आली होती. या कार्यशाळेसाठी प्रमुख मार्गदर्शक म्हणून मिशन आयएएस या संस्थेचे संचालक प्रा. डॉ. नरेशचंद्र काठोळे हे उपस्थित होते. प्रा. डॉ. काठोळे यांनी विद्यार्थ्यांना विविध स्पर्धा परीक्षा तसेच आयएएस अधिकारी बनण्यासाठी आत्मसात करावयाच्या महत्वाच्या गोष्टींबद्दल मार्गदर्शन केले.