‘मालवणातील भटक्या कुत्र्यांचा बंदोबस्त करा’

‘मालवणातील भटक्या
कुत्र्यांचा बंदोबस्त करा’
मालवण, ता. ९ : शहरातील भटक्या कुत्र्यांचा मालवण पालिकेने येत्या दहा ते पंधरा दिवसांत बंदोबस्त न केल्यास मनसेच्यावतीने पालिकेच्या बाहेर तीव्र आंदोलन छेडण्यात येईल, असा इशारा मनसेचे माजी शहराध्यक्ष विशाल ओटवणेकर यांनी दिला आहे. शहरातील भटक्या कुत्र्यांचा बंदोबस्त करावा, अशी मागणी यापूर्वीही मनसेने पालिकेकडे केली होती; मात्र याकडे पालिकेने दुर्लक्ष केले. त्यामुळे शहरात एका महिलेचा व तिच्या मुलाचा कुत्र्याने चावा घेतला. यात मुलगा गंभीर जखमी झाला आहे. कुत्र्यांच्या हल्ल्यामुळे शहरातील विविध भागांमध्ये भीतीचे वातावरण आहे. भटक्या कुत्र्यांचा बंदोबस्त करण्यासाठी पालिकेने तत्काळ आवश्यक उपाययोजना राबवाव्यात; अन्यथा पालिकेसमोर मनसेच्यावतीने तीव्र आंदोलन छेडले जाईल, असा इशाराही ओटवणेकर यांनी दिला.