मानसिक ताणाकडे, आरोग्याकडे दुर्लक्ष करू नका

- rat३p११.jpg-
२४N२९०२९
रत्नागिरी ः कार्यक्रमात उपस्थित विद्यार्थिनी.

मानसिक ताण, आरोग्याकडे दुर्लक्ष करू नका

श्वेता चव्हाण ः हेगशेट्ये महाविद्यालयात महिला विकास कार्यक्रम

सकाळ वृत्तसेवा
रत्नागिरी, ता. ३ ः मानसिक ताण हा वेगवेगळ्या प्रकारचा असून, तो सहन करण्याची प्रत्येकाची क्षमता वेगवेगळी असते. काहीजण केवळ सहन करत राहतात; पण बोलत नाहीत म्हणूनच त्या ताणाचा मनाबरोबरच शरीरावरही परिणाम होतो. त्यामुळे बोला, व्यक्त व्हा आणि योग्य तो सल्ला घ्या, असे सामाजिक कार्यकर्त्या श्वेता चव्हाण यांनी सांगितले.
येथील नवनिर्माण शिक्षणसंस्थेच्या एस. पी. हेगशेट्ये महाविद्यालयातील महिला विकास कक्षाच्यावतीने विद्यार्थिनींसाठी ‘मासिक पाळी व्यवस्थापन आणि किशोरावस्था-तारुण्यावस्थेतील आरोग्य, घ्यावयाची काळजी’ या विषयावर आयोजित कार्यक्रमात त्या बोलत होत्या. या वेळी राष्ट्रीय तंबाखू नियंत्रण कार्यक्रम समुपदेशक प्राची जाधव-भोसले, स्टाफ नर्स समीक्षा दैत्य, एस. पी. हेगशेट्ये महाविद्यालयाच्या प्राचार्या डॉ. आशा जगदाळे, महिला विकास कक्षाच्या प्रमुख प्रा. सुलोचना कुमारी उपस्थित होत्या. या प्रसंगी चव्हाण यांनी मानसिक तणावासाठी अॅक्टिव्हिटी घेतली. स्टाफ नर्स दैत्य यांनी मुलींची किशोरावस्थेकडून प्रौढावस्थेकडची वाटचाल सांगताना मासिक पाळी म्हणजे काय, मासिक पाळीचे चक्र, नियमित आणि अनियमित मासिक पाळीची लक्षणे, मासिक पाळीमध्ये शारीरिक, मानसिक बदल, लक्षणे, या दरम्याने घ्यायची काळजी या विषयी सविस्तर माहिती दिली. या कार्यक्रमात प्राचार्या डॉ. जगदाळे यांनी मनोगत व्यक्त केले. समुपदेशक प्रवीण भोयर, ऋत्विक मयेकर यांनीही विद्यार्थ्यांना मार्गदर्शन केले.
---
गैर प्रकाराबाबत आवाज उठवा

‘वयात येताना हितगुज उमलत्या कळ्यांशी'' यावर संगणकीय सादरीकरणाच्या माध्यमातून प्राची जाधव-भोसले यांनी मार्गदर्शन केले. जिल्ह्यात कुमारी मातांचे प्रमाण वाढत असल्याचे सांगून भोसले यांनी आज तारुण्यावस्थेत पदार्पण करताना वयाच्या त्या नाजूक टप्प्यावर मुलांविषयी आकर्षण निर्माण होते ते चुकीचे नाही; मात्र कोणत्याही परिस्थिती चुकीच्या भूलथापांना बळी पडू नका, आपल्यावर अत्याचार होतोय असे वाटल्यास लागलीच त्यावर आवाज उठवा. आपल्या करिअरला प्राधान्य द्या, असे आवाहन चव्हाण यांनी केले.