तालुकास्तर स्पर्धा

शुक्रवारी तालुकास्तरीय वकृत्व स्पर्धा
चिपळूण बौद्धजन हितसंरक्षक समितीतर्फे आयोजन
सकाळ वृत्तसेवा
चिपळूण , ता. ३ ः चिपळूण तालुका बौद्धजन हितसंरक्षक समिती आणि संस्थेच्या शिक्षण समितीच्यावतीने ६ डिसेंबरला महापरिनिर्वाण दिनी डॉ. बाबासाहेब आंबेडकर यांना अभिवादन करण्यासाठी तालुकास्तरीय वकृत्व स्पर्धेचे आयोजन केले आहे. ही स्पर्धा शहरातील विश्वभूषण डॉ. बाबासाहेब आंबेडकर स्मारक भवनात सकाळी ११ वा. होणार आहे.
संस्थेच्यावतीने तीन वर्षांपासून तालुकास्तरीय डॉ. आंबेडकर वक्तृत्व स्पर्धा महापरिनिर्वाणदिनी घेतली जाते. त्यानुसार यावर्षी ही स्पर्धा प्राथमिक, माध्यमिक व महाविद्यालयीन गटासाठी घेतली जाणार आहे. तीनही गटांकरिता रोख बक्षिसे, सन्मानचिन्ह व प्रशस्तीपत्र अशा प्रकारचे पारितोषिक देण्यात येणार आहे. प्राथमिक गटाकरिता (पाचवी ते सातवी) भारतीय राज्यघटनेचे शिल्पकार डॉ. बाबासाहेब आंबेडकर, समाज परिवर्तनात डॉ. बाबासाहेबांची भूमिका आणि कार्य हे दोन विषय असून, वेळ पाच मिनिटांची ठेवण्यात आली आहे. माध्यमिक गटासाठी (आठवी ते दहावी) राष्ट्र उभारणीत बाबासाहेबांचे योगदान तथा राष्ट्रप्रेमी बाबासाहेब, सामाजिक व आर्थिक, लोकशाही कधी प्रस्थापित होईल हे विषय ठेवण्यात आले आहेत. त्यांच्यासाठी वेळ सहा मिनिटे असतील. महाविद्यालयीन गटासाठी (अकरावी ते पदवी पदविका) आरक्षण धोरण आणि डॉ. बाबासाहेबांची भूमिका, खरेच संविधान व लोकशाही धोक्यात आली आहे काय? हे विषय ठेवण्यात आले आहेत. त्यासाठी सात मिनिटांची वेळ दिली आहे. शाळा तथा महाविद्यालयांमधून प्रत्येक गटातून जास्तीत जास्त दोनच विद्यार्थी सहभागी होऊ शकतील. या स्पर्धेबाबत सर्वाधिकार संयोजकांकडे असणार आहेत. तालुक्यातील जास्तीत जास्त शाळा व महाविद्यालयातील विद्यार्थ्यांनी या स्पर्धेत भाग घ्यावा, असे आवाहन संस्थेच्यावतीने करण्यात आले आहे.