पावशीतील एकाला लोखंडी रॉडने मारहाण

पावशीतील एकाला लोखंडी रॉडने मारहाण
सकाळ वृत्तसेवा
कुडाळ, ता. ११ ः आठशे रुपये दिले नाहीत म्हणून लोखंडी रॉडने मारहाण करून जखमी केल्याची घटना पावशी-मिटक्याचीवाडी नाका येथे घडली. याप्रकरणी गोविंद जयराम वराडकर यांनी दिलेल्या तक्रारीनुसार प्रसाद तवटे (रा. पावशी धरणवाडी) याच्याविरुद्ध येथील पोलिसात गुन्हा दाखल करण्यात आला.
पावशी-तवटे म्हाडेश्वरवाडी येथील गोविंद जयराम वराडकर हे आज कुडाळ येथे आठवडा बाजारासाठी आले होते. बाजार करून ते दुचाकीने त्यांचा मित्र महेंद्र तवटे याच्यासोबत पावशी येथे घरी परतत होते. यावेळी मिटक्याचीवाडी नाका येथे प्रसाद तवटे याने हात दाखवून त्यांची दुचाकी थांबविली आणि आठशे रुपये मागितले; मात्र वराडकर यांनी पैसे दिले नाहीत म्हणून प्रसादने त्यांना शिवीगाळ करत लोखंडी रॉडने मारहाण केली. यात वराडकर हे जखमी केले. महेंद्र तवटे यांनी त्यांना कुडाळ ग्रामीण रुग्णालयात उपचारासाठी दाखल केले. याप्रकरणी कुडाळ पोलिसांत प्रसाद तवटे याच्याविरुद्ध गुन्हा दाखल केला आहे.