शिक्षण विभागाकडून अनागोंदी कारभार

शिक्षण विभागाकडून अनागोंदी कारभार
राजन कोरगावकर ः अर्धा महिना संपला तरी शिक्षक वेतनाविना
सकाळ वृत्तसेवा
सिंधुदुर्गनगरी, ता. १३ ः जिल्हा परिषद शिक्षण विभागाचा अनागोंदी कारभार सुरु असून वरिष्ठ अधिकाऱ्यांचा प्रशासनावर वचक राहिलेला नाही. त्यामुळेच शिक्षकांचे पगार १२ तारीख उलटून गेली तरी सुद्धा झाले नाहीत. चालढकल करणाऱ्या अशा अधिकाऱ्यांवर कायदेशीर कारवाईसाठी वरिष्ठांकडे मागणी करणार असल्याचे महाराट्र राज्य प्राथमिक शिक्षक समितीचे सरचिटणीस राजन कोरगावकर यांनी प्रसिद्धी पत्रकात म्हटले आहे.
किमान पंचवीस तारखेच्या आधी बीडीएस आल्यास एक तारखेला पगार होऊ शकतो. २७ तारखेला बीडीएस येऊन सुद्धा १२ तारखेपर्यंत पगार न देणे म्हणजेच चालढकलच आहे, असा आमचा आरोप आहे. वेळेवर बिल सादर केली जात नाहीत. केली तर ती अर्धवट सादर केली जातात. काही तालुके वेळेवर सादर करतात. काही तालुके उशिरा सादर करतात. उशिरा सादर करणाऱ्या तालुका अधिकाऱ्यांवर शिक्षणाधिकाऱ्यांचा वचक असणार की नाही. सगळीच मनमानी चाललेली आहे. ना प्रमोशन ,ना वेळेवर पगार, ना कुठल्या प्रश्नांची सोडवणूक, हे असे किती दिवस चालणार? वरिष्ठ अधिकारी सुद्धा याकडे दुर्लक्ष करून असतात. शाळांना मिळणारे अनुदान दोन दिवसात पीएफएमएस करायला सांगून खर्ची घालायला सांगतात. ते शक्य नसल्याने रकमा मागे जातात. २०१२ पासून कोणत्याही प्रकारच्या पदोन्नतीच्या संधी नाही. सर्व जिल्ह्यात पदवीधर, केंद्रप्रमुख, विस्तार अधिकारी पदे भरली गेली. मात्र, या जिल्ह्यात येणाऱ्या अधिकाऱ्यांची मानसिकता पदोन्नती देण्याची नाही, अशा मानसिकतेमुळे या जिल्ह्यातील अनेक शिक्षक वंचित राहिले. काही निवृत्त सुद्धा झाले. त्यामुळे त्यांच्या आर्थिक नुकसानीला हे अधिकारीच जबाबदार आहेत. सकारात्मक मानसिकता असेल तर पगार वेळेवर होतील. मात्र, चालढकल करणाऱ्या अशा अधिकाऱ्यांवर कायदेशीर कारवाईसाठी वरिष्ठांकडे मागणी करणार असल्याचे श्री. कोरगांवकर यांनी पत्रकात म्हटले आहे.

कोट
जिल्हा परिषद कर्मचाऱ्यांचे पगार झाल्याशिवाय अधिकाऱ्यांनी पगार घेऊ नयेत, असे ज्यावेळी होईल त्यावेळी कर्मचाऱ्यांची वेदना त्यांना समजेल. महिन्याच्या शेवटी मिळणाऱ्या पगारावर कुटुंबाची गणिते अवलंबून असतात, हे वरिष्ठांनी लक्षात घ्यावे आणि कर्मचाऱ्यांचे पगार वेळीच घालण्याची तसदी घ्यावी.
- राजन कोरगावकर