कुंभार्ली घाटात ट्रक बंद पडल्याने वाहतूक ठप्प

ट्रक बंद पडल्याने वाहतूक ठप्प
कुंभार्ली घाटातील घटना ; पोलिसांनी केला मार्ग खुला
सकाळ वृत्तसेवा
चिपळूण, ता. १४ : कुंभार्ली घाटात ट्रक बंद पडल्याने पहाटे दोन तास वाहतूक ठप्प होती. पोलिस घटनास्थळी दाखल झाले त्यानंतर वाहतूक सुरळीत झाली.
चिपळूण-कराड मार्गावर कुंभार्ली या बारा किमीच्या घाट रस्त्यावर प्रचंड खड्डे पडले आहे. वळणावरचा रस्ता चक्क वाहून गेला आहे. पावसाळ्यात ही परिस्थिती निर्माण झाली. तेव्हापासून या रस्त्याची दुरुस्ती झालेली नाही. रस्त्याची देखभाल दुरुस्ती करण्यासाठी सार्वजनिक बांधकाम विभागाने वार्षिक तत्त्वावर ठेका दिला आहे. मात्र ठेकेदाराने रस्त्याची दुरुस्ती केली नाही. त्याचा त्रास वाहन चालकांना होत आहे. घाट रस्त्यामध्ये अवघड वळणावर रस्ता वाहून गेला आहे. त्या ठिकाणी वाहने सरकून अपघात होत आहेत. खड्ड्यामध्ये वाहने आढळून बंद पडत आहेत. एखादे वाहन बंद पडल्यानंतर दोन्ही बाजूने वाहतूक कोंडी होते आणि त्यातून किरकोळ अपघात होतात. शनिवारी पहाटे चार वाजता चिपळूण होऊन पाटणकडे जाणारा मालवाहू ट्रक खड्ड्यात आदळून बंद पडला होता. हा ट्रक रस्त्याच्या मधोमध बंद पडल्यामुळे वाहने बाहेर काढताना वाहन चालकांना कसरत करावी लागत होती. त्याच ठिकाणी खड्ड्यामध्ये दुसरा ट्रक आदळून बंद पडला. त्यामुळे दोन्ही बाजूची वाहतूक पूर्णपणे ठप्प झाली. कुंभार्ली घाटामध्ये प्रचंड धूके होते. त्यामुळे वाहन चालकांना रस्ता दिसत नव्हता. पुढे काय झाले आहे हे समजत नसल्यामुळे अनेक वाहनचालकांचा गोंधळ उडाला होता. पहाटे सहा वाजेपर्यंत वाहतूक कोंडी झाली होती. सहानंतर हळूहळू प्रकाश पडू लागला त्यानंतर घटनास्थळी पोलिस दाखल झाले. काही वेळातच बंद पडलेला ट्रक बाजूला करण्यात आला त्यानंतर वाहतूक सुरळीत झाली.