लांजा शहरातील तीन प्रभाग पाण्याविना

लांजात तीन प्रभाग पाण्याविना
पाईपलाईन फुटली : नागरिकांची गैरसोय
लांजा, ता. ७ ः मुंबई-गोवा महामार्गाच्या कामात पाईपलाईन फुटल्याने गेल्या चार दिवसांपासून लांजा नगरपंचायत हद्दीतील प्रभाग क्र. ४, ८ आणि ९ मध्ये पाणीपुरवठा झालेला नाही. त्यामुळे नागरिकांची प्रचंड गैरसोय झाली आहे. या पार्श्वभूमीवर शिवसेना उद्धव बाळासाहेब ठाकरे पक्षाचे नगरसेवक व शिवसैनिकांनी मंगळवारी महामार्ग ठेकेदार कंपनी अधिकाऱ्यांना जाब विचारला.
शहरातील तीनही प्रभागांत गेले पाच दिवस पाणी नसल्या कारणाने शिवसेना उद्धव बाळासाहेब ठाकरे पक्षाचे नगरसेवक स्वरूप गुरव, राजेश हळदणकर, पदाधिकारी सचिन लिंगायत, नितीन शेट्ये व इतर पदाधिकारी यांनी श्रीराम पूल येथे जाऊन हायवेच्या कामांमध्ये तुटलेल्या पाईपलाईनच्या ठिकाणी जाऊन आक्रमक भूमिका घेतली. गेले चार दिवस अर्ध्या लांजा शहरामध्ये पाणीपुरवठा बंद असूनही ठेकेदार कंपनीकडून अद्याप काम सुरू नसल्याने आक्रमक होत अधिकाऱ्यांना जागेवर बोलून त्यांना जाब विचारत तातडीने काम सुरू करण्याची मागणी केली.
त्यानुसार मंगळवारी सायंकाळपर्यंत पाणीपुरवठा सुरळीत करण्याचे आश्वासन दिले. दरम्यान, काम चालू करण्याच्या मागणीनंतर कंपनीकडून कामाला तातडीने सुरुवात करण्यात आली. त्याचबरोबर लांजा नगरपंचायत मुख्याधिकारी यांच्या दालनामध्ये मुख्याधिकारी आणि शिवसेना उद्धव बाळासाहेब ठाकरे पक्षाचे नगरसेवक, पदाधिकारी यांनी ठेकेदार कंपनीसोबत चर्चा करून यावरती कायमस्वरूपी तोडगा काढण्याचे मागणी उद्धव बाळासाहेब ठाकरे पक्षाचे नगरसेवक व पदाधिकारी यांच्याकडून करण्यात आली.