बांदा बसस्थानकाच्या जागेची हद्द निश्चित करू

बांदा बसस्थानकाच्या
जागेची हद्द निश्चित करू

‘एसटी’ची ग्वाही; धुरींचे उपोषण स्थगित

सकाळ वृत्तसेवा
बांदा, ता. १६ ः महाराष्ट्र राज्य परिवहन मंडळाने बांदा बसस्थानक परिसरात गैरव्यवहार करून खासगी जागेवर अतिक्रमण केले असून महामंडळाने आपल्या जागेची हद्द निश्चित करावी, यासाठी येथील सामाजिक कार्यकर्ते शामसुंदर धुरी यांनी आज केलेले उपोषण सायंकाळी एसटी प्रशासनाच्या आश्वासनानंतर सोडले. मात्र दिलेल्या आश्वासनाची पूर्तता न केल्यास पुन्हा उपोषणास बसण्याचा इशाराही धुरी यांनी प्रशासनास दिला.
यात एसटी प्रशासनाकडून केलेल्या जमिनीच्या मोजणीचा नकाशा आणि आवारात भाडे तत्वावर असणाऱ्या दुकानाच्या बाजूने कुंपण घालण्याची मागणी धुरी यांनी केली होती. ही मागणी पूर्ण करण्याचे आश्वासन प्रशासनाकडून देण्यात आले. यावेळी सहायक वाहतूक अधीक्षक राजाराम राऊळ यांच्या आश्वासनानंतर उपोषण सोडले.
श्यामसुंदर धुरी यांनी प्रशासनाला दिलेल्या निवेदनात म्हटले होते की, आपल्या जागेत अतिक्रमण केले आहे. संबंधित जागा महामार्गालगत असून बांदा बसस्थानकाला लागून आहे. ही जागा आपले काका सूर्यकांत धुरी यांच्या मालकीची आहे. मालकीची काही जागा एसटी महामंडळाच्या जागेत आहे. याबाबत वेळोवेळी हद्द ठरविण्याबाबत पत्रव्यवहार केला आहे, मात्र याबाबत ठोस कार्यवाही केली नाही. त्यामुळे एसटी महामंडळाने हद्द ठरविण्यासाठी त्यांचे लक्ष वेधावे, यासाठी उपोषणाचा निर्णय घेतला. त्यानुसार आज उपोषणास बसले होते. उपोषणस्थळी पोलिस बंदोबस्त होता. उपोषणास सरपंच प्रियांका नाईक यांच्यासह अनेकांनी समर्थन दिले. सायंकाळी एसटी प्रशासनाच्या वरिष्ठ अधिकाऱ्यांनी भेट देत धुरी यांचे म्हणणे ऐकून घेतले. मागणीची येत्या काही दिवसांत पूर्तता करू, असे लेखी आश्वासन देताच धुरी यांनी उपोषण सोडले.