चिपळूण ःसमर्थ शिंदेच्या नेतृत्व गुणांना राष्ट्रपतींची दाद

ratchl२५४.jpg
47686
समर्थ शिंदे
---------

कळकवणेच्या समर्थ शिंदेच्या
नेतृत्व गुणांना राष्ट्रपतींची दाद
स्पर्धा परीक्षेत सुयश; शिमलामध्ये प्रशिक्षण
सकाळ वृत्तसेवा
चिपळूण, ता. २५ः कोकणचे व तालुक्यातील दसपटी विभागातील कळकवणे गावचे सुपुत्र समर्थ शिंदे यांना दिल्ली येथे राष्ट्रपती भवनात राष्ट्रपती द्रौपदी मुर्मू यांच्या उपस्थितीत झालेल्या कार्यक्रमात भारतीय लेखापरीक्षण आणि लेखा सेवा (आयएअॅण्डएएस) विभागाकडून नेतृत्व करण्याची संधी मिळाली. त्यांच्या या नेतृत्वाला खुद्द राष्ट्रपतींकडून दाद मिळाली. शिमला येथील प्रशिक्षणात प्रशासकीय सेवेतील माहितीसह इमानदारी, पारदर्शकता आणि निःपक्षपातीपणाने काम करण्याची उर्मी मिळाली असल्याची भावना समर्थ शिंदे यांनी या निमित्ताने स्पष्ट केली.
भारतीय लोकसेवा आयोग परीक्षेतून निवड झालेल्या भावी सनदी अधिकाऱ्यांना शिमला येथे प्रशिक्षण देण्यात आले. या प्रशिक्षणानंतर संबंधित अधिकाऱ्यांची दिल्ली येथील राष्ट्रपती भवनात राष्ट्रपती मुर्मू यांची भेट घडवून देण्यात आली. या वेळी विविध विभागातील प्रशिक्षणार्थी अधिकाऱ्यांनी प्रशिक्षणादरम्यानचे अनुभव कथन केले. या वेळी आयए अॅण्ड एएस विभागात प्रशिक्षण घेणारे शिंदे यांनी भारतातील १९ अधिकाऱ्यांच्या टीमचे नेतृत्व करत आपल्या भावना व्यक्त केल्या.
ते म्हणाले, भारतीय लोकसेवा आयोग २०२४च्या बॅचमधून निवड झाली. शिमला येथील प्रशिक्षणात देशातील प्रतिष्ठित संस्थांशी काम करण्याची संधी मिळाली. त्यांचे कामकाज अनुभवत आहे. हे प्रशिक्षण प्रभावी नागरिक आणि अधिकारी बनण्यास उपयुक्त ठरणार आहे.