सावर्डेतील राधाकृष्ण मंदिरात सप्ताह

सावर्डेतील राधाकृष्ण
मंदिरात सप्ताह
सावर्डेः सावर्डे काजरकोंडवाडी येथील श्री राधाकृष्ण मंदिरात ८ ते ११ मार्च या कालावधीत अखंड हरिनाम सप्ताहाचे आयोजन केले आहे. पहाटे चार ते सहा काकड आरती, सायंकाळी सहा ते सात हरिपाठ व रात्री नऊ ते अकरा कीर्तन असा कार्यक्रम होणार आहे. ८ला वैभव कदम, ९ला गजवडीकर बाबा महाराज, १०ला नारायण पवार, ११ला अरूण विरधनकर यांचे कीर्तन होणार आहे. या आध्यात्मिक कार्यक्रमाचा सर्वांनी लाभ घ्यावा, असे आवाहन मंदिर प्रशासनाने केले आहे.
------------
डॉ. नीरज हजारे यांना
बीडीएस पदवी प्रदान
साडवली ः देवरूखचे प्रसिद्ध कॅरमपटू मोहन हजारे यांचे सुपुत्र नीरज हजारे यांना भारती विद्यापीठ पुणे येथील पदवीदान समारंभात बीडीएस (बॅचलर ऑफ डेंटल सर्जरी) पदवी प्रदान करण्यात आली. या वेळी लोकसभा स्पीकर ओम बिर्ला, भारती डेन्टल युनिव्हर्सिटीचे विश्वजित कदम आदी उपस्थित होते. नीरज यांनी सांगली येथील कॉलेजमधून ही पदवी मिळवली आहे. पुढे ते एमडीएस करणार आहेत. राष्ट्रीय कॅरमपटू द्रोण हजारे यांचे ते थोरले बंधू आहेत.
---------
ज्ञानरश्मी वाचनालयात
रंगभरण, निबंध स्पर्धा
गुहागरः ज्ञानरश्मी वाचनालय येथे मराठी भाषा गौरव दिन उत्साहात झाला. या निमित्ताने शालेय विद्यार्थ्यांसाठी रंगभरण व निबंध स्पर्धा घेण्यात आली. या वेळी राजेंद्र आरेकर, प्रशांत साटले, वाचनालयाचे कार्याध्यक्ष दत्तात्रय पर्शुराम गुरव गुरूजी, हायस्कूलचे मुख्याध्यापक सुधाकर कांबळे, प्रभुनाथ देवळेकर, अरूणा पाटील आदी उपस्थित होते. प्रा. मनाली बावधनकर यांनी कवी विष्णू वामन शिरवाडकर यांना कुसुमाग्रज हे नाव कसे पडले या विषयी माहिती दिली. रंगभरण स्पर्धेत छोट्या गटात स्वरा वायंगणकर, अनुज बामणे, जिया जोशी; पहिली ते चौथी गटात आयुष जोशी, रूंजी जोशी, सर्वेश जोशी; पाचवी ते सातवी गटात अपेक्षा मुरकुटे, वल्लभ सरकार, गोजिरी मुळे यांनी अनुक्रमे क्रमांक मिळवले. निबंध स्पर्धेत पाचवीमध्ये सानवी खातूने प्रथम, सहावीमध्ये दुर्वा नाटेकरने, सातवीमध्ये शर्वरी कदमने प्रथम क्रमांक मिळवला. सर्व विद्यार्थ्यांना वाचनालयातर्फे सन्मानचिन्ह व भेटवस्तू देण्यात आले.