मे नाही मार्चपासूनच काळ्याकोटला सुट्टी...

काळा कोट न वापरण्याची
वकिलांना चार महिने मुभा
बार कौन्सिलचा निर्णय ः उष्‍म्याचा परिणाम
सकाळ वृत्तसेवा
कोल्हापूर, ता. ४ ः पुढील चार महिने काळा कोट परिधान न करता न्यायालयीन कामकाजात सहभागी होण्याची मुभा वकिलांना देण्यात आली आहे. उन्हाळ्यानिमित्त हा निर्णय झाला आहे. पूर्वी ही सूट केवळ मे आणि जून या दोन महिन्यांसाठीच होती. आता १ मार्च ते ३० जूनपर्यंत ही सूट वाढवण्याचा प्रस्ताव मंजूर केला आहे. महाराष्ट्र आणि गोवा बार कौन्सिलच्या वतीने हा निर्णय घेण्यात आला आहे.
पोलिसांना, वकिलांना ड्रेस कोड आहे. न्यायालयात ड्रेस कोडमध्येच हजर राहावे लागते. वकिलांना काळ्या कोटमुळे प्रचंड उष्म्याचा सामना करावा लागतो. त्यातून अनेकांच्या प्रकृतीवर परिणाम होऊ शकतो. अलीकडे राज्यातील उष्णतामान दिवसेंदिवस वाढत आहे. त्यामुळे नागरिक काळे कपडे घालणे टाळताना दिसतात. वकिलांना न्यायालयात काळा कोट घालणे बंधनकारक असते. त्यामुळे काळाकोट घालून न्यायालयात हजर राहणे वकिलांना असहाय्य होते. याचा विचार करून महाराष्ट्र आणि गोवा बार कौन्सिलने (बीसीएमजी) वकिलांना दरवर्षी १ मार्च ते ३० जून या कालावधीत काळा कोट परिधान करण्याची गरज नसल्याचा निर्णय घेतला आहे. याचा फायदा ज्येष्ठ वकिलांना अधिक होणार आहे.