शिक्षक, शिक्षकेतरांचे उद्या धरणे आंदोलन

शिक्षक, शिक्षकेतरांचे
उद्या धरणे आंदोलन
दोडामार्ग, ता. ४ : माध्यमिक शाळांमध्ये शिक्षक पदासाठी पात्र असणाऱ्या शिक्षकेतर कर्मचाऱ्यांना वेतन श्रेणी संरक्षणासह शिक्षक पदावर विनाअट पदोन्नती द्यावी, माध्यमिक शाळांतील शिक्षकेतर कर्मचार्‍यांसाठी बक्षी समितीने शिफारस केल्याप्रमाणे नवीन सुधारित आश्वासित प्रगती योजना दहा, वीस, तीस वर्षांनंतरचा लाभ तत्काळ लागू करावी, माध्यमिक शाळेतील शिक्षकेतर कर्मचारी पदभरती तत्काळ सर्व जिल्ह्यांत सुरू करावी आदी मागण्यांसाठी सरकारी, निमसरकारी शिक्षक, शिक्षकेतर कर्मचारी समन्वय समितीच्या वतीने जिल्हाधिकारी कार्यालयासमोर गुरुवारी (ता. ६) सकाळी धरणे आंदोलन करण्यात येणार आहे. जिल्ह्यातील शिक्षकेतर कर्मचाऱ्यांनी सहभागी व्हावे, असे आवाहन अध्यक्ष अनिल राणे, कार्याध्यक्ष प्रदीप सावंत, सचिव गजानन नानचे, सिंधुदुर्ग जिल्हा माध्यमिक उच्च माध्यमिक व अध्यापक विद्यालय शिक्षकेतर कर्मचारी संघटना यांनी केले आहे.

रिक्षा संघटनेची आज
सिंधुदुर्गनगरीत बैठक
सिंधुदुर्गनगरी, ता. ४ ः सिंधुदुर्ग जिल्हा रिक्षाचालक मालक संघाचे आज रजिस्ट्रेशन झाले. त्यामुळे संघाची पुढील दिशा ठरविण्यासाठी आणि रिक्षाचालक-मालक यांच्या विविध मुद्द्यांवर चर्चा करण्यासाठी या संघाची बैठक गुरुवारी (ता. ६) सकाळी १० वाजता येथील श्री देव रवळनाथ मंदिर सभागृहात आयोजित करण्यात आली आहे. रिक्षाचालक मालकांनी उपस्थित राहावे, असे आवाहन जिल्हाध्यक्ष नागेश ओरोसकर यांनी केले आहे. या बैठकीत रजिस्ट्रेशन व जिल्हा कार्यकारिणीबाबत माहिती देणे, तालुकाध्यक्ष निवड, विविध समस्यांवर चर्चा तसेच अध्यक्षांच्या परवानगीने आयत्यावेळी येणाऱ्या विषयांवर चर्चा करून त्यावर निर्णय घेण्यात येणार आहे. रिक्षाचालक मालकांनी या बैठकीस उपस्थित राहून आपल्या समस्या मांडाव्यात, असे आवाहन करण्यात आले आहे.