खेड-क्राईम

दागिन्यांच्या पर्सची
रेल्वेतून चोरी
खेड ः कोकण रेल्वेमार्गावरून धावणाऱ्या तुतारी एक्स्प्रेस गाडीतून कणकवली ते खेड रेल्वेस्टेशन असा प्रवास करत असताना शालिनी भिकाजी नेरकर यांची पर्स चोरट्याने चोरली. त्या झोपलेल्या असताना पर्स व त्यातील सोन्याच्या तारेची नथ, मोबाईल आदी ऐवज लंपास केला. हा ऐवज २६ हजारांचा होता. ही चोरी २ मार्चला रात्री ९ वाजता कणकवली ते खेड रेल्वेस्टेशन दरम्यान घडली. शालिनी नेरकर (६०, रा. नेरूळ, नवी मुंबई) यांनी येथील पोलिस ठाण्यात फिर्याद दिली. त्यानुसार खेड पोलिसांनी अज्ञात चोरट्याविरोधात गुन्हा दाखल केला आहे.

काडवलीमधून
ब्रेकर मशीन चोरले
खेड ः तालुक्यातील काडवली-गजवाडी येथे नवीन सार्वजनिक विहिरीच्या खोदाईसाठी ठेवलेले १० लाखांचे ब्रेकर मशिन चोरट्याने चोरल्याची तक्रार येथील पोलिस ठाण्यात दाखल करण्यात आली. ही घटना १ ते २ मार्च या कालावधीत घडल्याचे प्रल्हाद प्रकाश लाड यांनी तक्रारीत नमूद केले आहे. लाड यांच्या मालकीचे जेसीबी मशिन नवीन सार्वजनिक विहिरीच्या खोदाई कामासाठी ठेवले होते. तीन टन वजनाच्या मशिनसह इतर सुटे भाग चोरट्याने लांबवले. मशिन चोरीस गेल्याचे निदर्शनास येताच पोलिस ठाणे गाठून तक्रार नोंदवली. याबाबतचा अधिक तपास पोलिस करत आहेत.