उभ्या ट्रकला धडक बसून दुचाकीवरील दोघे गंभीर

उभ्या ट्रकला धडक बसून
दुचाकीवरील दोघे गंभीर

ओसरगाव टोलनाका येथील घटना

कणकवली, ता. ४ : उभ्या असलेल्‍या ट्रकला मागाहून धडक दिल्याने दुचाकीवरील दोघे गंभीर जखमी झाले. ही घटना ३ मार्च रोजी सकाळी दहा वाजता घडली. शिवाजी पांडुरंग घाडीगावकर (वय ५२) आणि निखिल गुणाजी घाडीगावकर (दोघेही रा. वागदे नमसवाडी), अशी जखमींची नावे आहेत. याप्रकरणी ट्रक चालकावर येथील पोलिस ठाण्यात गुन्हा दाखल झाला आहे.
पडवे (ता. कुडाळ) येथे सेंट्रिंग कामासाठी शिवाजी आणि निखिल हे दोघे ३ मार्च रोजी ते पडवे येथून वागदे येथे दुचाकी (एमएच ०५ अेआर ८६६२) घेऊन निघाले होते. महामार्गावरील ओसरगाव येथील टोलनाका परिसरात ट्रक (एमएच १२ क्युजी ३०४४) उभा करून ट्रक चालक राहुल हनुमंत बर्गे (वय ३४, रा. सातारा) हा तेथील एका हॉटेलमध्ये चहा नाष्ट्यासाठी गेला होता. टोल नाक्‍यावर उभ्या ट्रकचा अंदाज न आल्‍याने वेगाने येणारी दुचाकी ट्रकच्या मागील बाजूस धडकली. यात दोघेही गंभीर जखमी झाले. स्थानिकांनी जखमींना तातडीने ओरोस येथील उपजिल्‍हा रुग्‍णालयात दाखल केले. याप्रकरणी ट्रक चालक राहुल बर्गे याच्यावर पोलिसांनी गुन्हा दाखल केला आहे. अधिक तपास कणकवली पोलिस करत आहेत.