खेडमध्ये पाणीपट्टी वसुलीचे काम वेगाने

खेडमध्ये पाणीपट्टी वसुली जोरात
सकाळ वृत्तसेवा
खेड, ता. १२ : नगरपालिकेने जानेवारी महिन्यातच थकित पाणीपट्टीधारकांना दणका देण्यास सुरवात केल्यानंतर कारवाईचा धसका घेतलेल्या अनेक थकितदारांनी कराची रक्कम भरण्यासाठी पुढाकार घेतला. पालिकेचे अधिकारी, कर्मचारी पाणीपट्टीसह मालमत्ता कराची वसुली करण्यात गुंतले आहेत. मार्चअखेरपर्यंत उद्दिष्ट पूर्ण करण्याचा निर्धार नगर प्रशासनाने केला आहे.
मुख्याधिकारी महादेव रोडगे, प्रशासकीय अधिकारी प्रमोद ठसाळे यांच्या मार्गदर्शनाखाली पालिकेच्या पाणी विभागातील पथकाने जानेवारी महिन्यातच थकित पाणीपट्टी थकबाकीदारांविरोधात कारवाईची मोहीम सुरू केली होती. ६०हून अधिक थकित पाणीपट्टीधारकांचा पाणीपुरवठाही खंडित केला होता. या कारवाईनंतर थकितदारांनी नगर पालिकेत पाणीपट्टी भरणा करण्यास सुरवात केली होती. पथकाने कारवाईची मोहीम तीव्र केल्यानंतर अनेकांचे धाबे दणाणले होते.
---