रत्नागिरी-ज्येष्ठ नागरिकांसाठी हेल्पलाईन नंबर सुरू

ज्येष्ठ नागरिकांसाठी
हेल्पलाईन नंबर सुरू
रत्नागिरी, ता. १२ः जिल्ह्यातील ज्येष्ठ नागरिकांना कुठल्याही संकटाच्यावेळी तसेच त्यांच्या तक्रारी, अडचणीचे निवारण होऊन त्यांना आवश्यक ती सर्व मदत मिळावी, या हेतूने जिल्हा पोलिस अधीक्षक धनंजय कुलकर्णी यांच्या संकल्पनेतून रत्नागिरी जिल्हा पोलिसदलातर्फे ज्येष्ठ नागरिकांच्या सुरक्षेसाठी ८३९०९२९१०० हा नवीन हेल्पलाईन नंबर सुरू केलेला आहे. यामध्ये व्हॉटसअॅपसुद्धा उपलब्ध आहे.
घरातील तरुण पुरुष व महिला या नोकरी व व्यवसायानिमित्त मुंबई व इतर शहरांमध्ये वास्तव्यास असतात. घरामध्ये ज्येष्ठ नागरिक हे एकटेच असतात तसेच निराधार ज्येष्ठ नागरिक हे सुद्धा घरामध्ये एकटेच असतात. अशावेळी ज्येष्ठ नागरिकांचे तत्काळ मदतीसाठी व त्यांचे तक्रारी, अडचणींचे निवारण करण्यासाठी हेल्पलाईन नंबर सुरू केला आहे. हा नंबर २४ तास सुरू असणार आहे. ज्येष्ठ नागरिक हा समाजाचा महत्वपूर्ण घटक असून, त्यांच्या सुरक्षेची प्राधान्याने काळजी घेण्यासाठी रत्नागिरी पोलिस कटिबद्ध आहेत. अडचणीच्यावेळी ज्येष्ठ नागरिकांनी तत्काळ मदतीसाठी मोबाईल नंबर ८३९०९२९१०० या हेल्पलाईन नंबरवर फोन किंवा व्हॉटसअॅप् मेसेज करण्याबाबत आवाहन जिल्हा पोलिस अधीक्षक धनंजय कुलकर्णी यांनी केले आहे.