रेल्वे मार्गावरील दाखल प्रकरणे जिल्हा न्यायालयात

रेल्वे मार्गावर दाखल होणारी
प्रकरणे जिल्हा न्यायालयात
रत्नागिरी, ता १८ः कोकण रेल्वेमार्गावरील रत्नागिरी लोहमार्ग पोलिस ठाण्यात दाखल होणारी प्रकरणे रत्नागिरी न्यायालयात चालवण्यात येणार आहेत. २० फेब्रुवारी २०२५ पासूनचे रिमांड काम व नव्याने दाखल होणारे दोषारोपपत्र सर्वप्रथम मुख्य न्यायदंडाधिकारी यांच्याकडे दाखल होतील आणि रत्नागिरी न्यायदंडाधिकारी वर्ग-१ यांच्या न्यायालयात निकाली निघणार आहेत. निकाली प्रकरणांचे अपिल कार्यक्षेत्र सत्र न्यायालय रत्नागिरी असेल, अशी माहिती जिल्हा न्यायालयाकडून दिली आहे.
कोकण रेल्वेमार्गावर रत्नागिरी लोहमार्ग पोलिस ठाणे नव्याने सुरू केले आहे. रत्नागिरी लोहमार्ग पोलिस ठाण्याच्या अधिकार क्षेत्रामध्ये कोलाड, इंदापूर, माणगांव, गोरेगांवरोड, वीर, सापेबामणे, करंजाडी, विन्हेरे, दिवाणखवटी, खेड (पोलिस दूरक्षेत्र), अंजणी, कळंबणी, चिपळूण, कामथे, सावर्डे, आरवली रोड, संगमेश्वर रोड, कडवई, उक्षी, भोके, रत्नागिरी, निवसर, आडवली, वेरवली, विलवडे, सौंदळ, राजापूर रोड आदींचा समावेश आहे. या अधिकारक्षेत्राच्या २७ पोलिस कार्यक्षेत्रांमध्ये भारतात व महाराष्ट्रात अस्तित्वात असलेल्या रेल्वे अॅक्ट १९८९ व रेल्वे प्रोटेक्शन अॅक्ट १९६६ कायद्याप्रमाणे न्यायालयापुढे कामकाज चालणार आहे, असे जिल्हा न्यायालय रत्नागिरी यांच्याकडून सांगण्यात आले आहे.