बाजारपेठेमध्ये रस्ता खोदाई

संगमेश्वर बाजारपेठेत रस्ता खोदाई
खासगी कंपनीकडून काम ; ग्रामस्थांकडून संताप
सकाळ वृत्तसेवा
संगमेश्वर, ता. २६ ः संगमेश्वर बाजारपेठेमध्ये काँक्रिट रस्ता खोदून खासगी कंपनीकडून अचानक पाईप टाकण्याचे काम सुरू केल्याने संगमेश्वरवासियांनी संताप व्यक्त केला आहे.
संगमेश्वर बाजारपेठ शुक्रवारी बंद असते. बंद बाजारपेठेचा फायदा उठवत अचानक खासगी कंपनीकडून पाईप टाकण्याचे काम सुरू केले आहे. हे काम करत असताना ठिकठिकाणी रस्ते खोदल्याने पाण्याची लाईन तसेच काँक्रिटीकरण रस्ता खड्डेमय झाला आहे. संगमेश्वर बाजारपेठ नागरी सुविधा अभाव व दिवसेंदिवस घटत जाणाऱ्या लोकसंख्येमुळे हवालदिल झाली आहे. खूप वर्षांनी संगमेश्वर बाजारपेठेत सिंमेट काँक्रिटचा रस्ता झाला. कंपनीकडून रस्ता खोदून काम सुरू केल्याने काँक्रिटीकरण रस्ता पूर्णपणे खराब झाला असून, हा रस्ता पुन्हा काँक्रिटीकरण करणार का? असा प्रश्न संगमेश्वरवासीय विचारत आहेत. संगमेश्वर येथील प्रसिद्ध निनावे देवी मंदिराचा जीर्णोद्धार सोमवारी प्रारंभ होत आहे, असे असताना कोणत्याही प्रकारची पूर्वसूचना न देता हे काम सुरू केल्याने संताप व्यक्त होत आहे.