वाचनाभिमुख उपक्रमांसाठी सहकार्य

60074

वाचनाभिमुख उपक्रमांसाठी सहकार्य

जेरान फर्नांडिस ः आचरा वाचनालयात ग्रंथप्रदर्शनास प्रतिसाद

सकाळ वृत्तसेवा
आचरा, ता. २६ ः वाचन संस्कृती वाढविण्यासाठी रामेश्वर वाचनालय चालवत असलेले उपक्रम कौतुकास्पद आहेत. यासाठी आचरा ग्रामपंचायतीचे नेहमी सहकार्य राहील, असे प्रतिपादन आचरा सरपंच जेरान फर्नांडिस यांनी रामेश्वर वाचन मंदिर येथे केले. श्री रामेश्वर सार्वजनिक वाचन मंदिर, आचरा या संस्थेने जागतिक पुस्तक दिनाचे औचित्य साधून ग्रंथप्रदर्शन आयोजित केले होते. या ग्रंथप्रदर्शनाचे उद्‍घाटन आणि प्रिंटर प्रदान कार्यक्रमात ते बोलत होते.
यावेळी वाचनालयाचे अध्यक्ष बाबाजी भिसळे, उपसरपंच संतोष मिराशी, ग्रामविकास अधिकारी पी. जी. कदम, उपाध्यक्ष अशोक कांबळी, कार्यवाह अर्जुन बापर्डेकर, जयप्रकाश परुळेकर, उर्मिला सांबारी, वैशाली सांबारी, भिकाजी कदम, ग्रंथपाल विनिता कांबळी, विलास आचरेकर, पंच सदस्य महेंद्र घाडी, पंकज आचरेकर, चंदू कदम, ग्रामपंचायत कर्मचारी नरेश परब आदी उपस्थित होते.
श्री रामेश्वर सार्वजनिक वाचन मंदिर आचरा या संस्थेने जागतिक पुस्तक दिनाचे औचित्य साधून ग्रंथप्रदर्शन आयोजित केले होते. यात कथा, कादंबरी, बालसाहित्य, संदर्भ व इतर प्रकारच्या पुस्तकांचा समावेश होता. जागतिक पुस्तक दिनाचे औचित्य साधून आचरा ग्रामपंचायतीने संस्थेच्या मागणीनुसार लीगल साईज प्रिंटर संस्थेस देणगीदाखल दिला. ‘पुस्तक दिनाचे महत्त्व’ या विषयावर संस्थेच्या कार्यकारिणी सदस्या उर्मिला सांबारी यांनी मत मांडले. आचरा ग्रामसेवक कदम व आचरा न्यू इंग्लिश स्कूलच्या शिक्षिका मधुरा माणगावकर यांनीही वाचनाचे महत्त्व उपस्थितांना पटवून दिले. संस्थेचे अध्यक्ष बाबाजी भिसळे यांनी वाचनाचे महत्त्व तसेच आचरा ग्रामपंचायतीला संस्थेच्या अपुऱ्या जागेबद्दल माहिती देऊन संस्थेच्या विस्तारित इमारतीसाठी सहकार्य करावे, असे आवाहन केले. उपाध्यक्ष अशोक कांबळी यांनी आभार मानले.