ःशाळा संच मान्यतेचा शासन निर्णय रद्द करा

शाळा संचमान्यतेचा शासननिर्णय रद्द करा
शिक्षण संस्थाचालक संघ ः सगमेश्वरमधील १० शाळा शून्यशिक्षकी
सकाळ वृत्तसेवा
संगमेश्वर, ता. ५ ः संगमेश्वर तालुका शिक्षण संस्थाचालक संघाची बैठक नुकतीच शिवणे येथील दादासाहेब सरफरे विद्यालयात झाली. या वेळी १५ मार्च २०२४चा माध्यमिक शाळा संचमान्यतेचा शासननिर्णय रद्द करण्यावर शासनाने निर्णय घ्यावा, अशी मागणी करण्यात आली. त्यानुसार जिल्हा संघाला पत्र देण्यात आले.
संगमेश्वर तालुका संघाचे अध्यक्ष राजाराम गर्दे यांच्या मार्गदर्शनाखाली झाली. यामध्ये माध्यमिक शाळा संचमान्यतेचा शासननिर्णय १५ मार्च २०२४च्या परिपत्रकावर विचारविनिमय करण्यात आला. या प्रसंगी संघाचे तालुका सचिव प्रभाकर सनगरे, फैज पाटणकर, वांझोळेचे अनिल पंदेरे, शहाणे, कुवळेकर, तुरळचे पाटील, सुर्वे, बुरंबीचे शांताराम भुरवणे, शरद बाईत, डिंगणीचे पाटील आदी उपस्थित होते. या निर्णयामुळे संगमेश्वर तालुक्यातील दुर्गम, डोंगराळ भागात असलेल्या माध्यमिक शाळेच्या कमी होत जाणाऱ्या पटसंख्यामुळे मान्यताप्राप्त शिक्षकांची संख्या शुन्यावर येणार आहे. सभेत संगमेश्वर तालुक्यातील शाळांचा आढावा घेण्यात आला. संचमान्यतेमुळे तालुक्यातील किमान १० शाळा शून्यशिक्षकी होतील. त्या शाळेतील विद्यार्थ्यांच्या शिक्षणाची आबाळ होणार असून, त्यासाठी कोणत्याही प्रकारची पर्यायी व्यवस्था या शासननिर्णयामध्ये नमूद केलेली नाही, असा मुद्दा उपस्थित करण्यात आला तसेच शासनाच्या या निर्णयाबद्दल तीव्र नाराजी व्यक्त केली गेली. या निर्णयांचा पाठपुरावा जिल्हा संघटनेच्या माध्यमातून करण्यात यावा, असे ठरवण्यात आले.
---
संचमान्यतेची माहिती देऊ नये
संगमेश्वर तालुक्याप्रमाणेच अन्य तालुक्यातही शून्यशिक्षकी शाळा होण्याची शक्यता आहे. त्यामुळे हा शासननिर्णय रद्द होत नाही तोपर्यंत संचमान्यतेकरिता आवश्यक बाबींची माहिती शिक्षण विभागाला देऊ नये, असाही निर्णय बैठकीत घेण्यात आला. हा निर्णय रद्द व्हावा याकरिता सर्व त्या पातळ्यांवर प्रयत्न करण्याचे एकमुखी ठरवण्यात आले.