माजळ, पाथरवाडी, जावडे मार्गावर बस सुरू करा

माजळ, पाथरवाडी मार्गावर बस सुरू करा
प्रवाशांची मागणी ; रस्ता दुरूस्ती पूर्ण झाल्याचे पत्र
सकाळ वृत्तसेवा
लांजा, ता. ६ : लांजा तालुक्यातील माजळ, पाथरवाडी, जावडे या मार्गावरून जाणाऱ्या एसटी बस वाहतुकीस कोणताही अडथळा होणार नाही, रस्ता वाहतुकीस योग्य आहे असे सार्वजनिक बांधकाम विभागाकडून आगार व्यवस्थापकांना कळवूनही या मार्गावरील बस बंद केल्यामुळे प्रवाशांमध्ये तीव्र नाराजी व्यक्त केली जात आहे. ही बससेवा सुरू करावी, अशी मागणी केली जात आहे.
या मार्गावर १ मे पासून एसटी बसच्या फेऱ्या अचानक बंद करण्यात आल्या आहेत. त्यामुळे प्रवाशांची गैरसोय होत आहे. काही फेऱ्या ताटकेवाडी, रावारीफाटा, कातळगाव फाटा आणि माजळ शाळेपर्यंत जात असल्याने पुढे जाणाऱ्या प्रवाशांचे खूप हाल होत आहेत तसेच ५ मे रोजी माजळ, जावडे, पाथरवाडी ४ वाजता सुटणारी बस अचानक कोणतीही कल्पना न देताच बंद केली. त्यामुळे प्रवाशांचे हाल होत आहेत. लांजा बांधकाम विभागाने रस्ता वाहतुकीस योग्य असल्याचे पत्र लांजा आगाराला दिले आहे. तरीही बस का सोडण्यात येत नाही? असा प्रश्न प्रवाशांकडून उपस्थित केला जात आहे. या गैरसोयीकडे सर्वच लोकप्रतिनिधींनी दुर्लक्ष केले आहे. प्रवाशांची गैरसोय लक्षात घेता बससेवा सुरू करण्याची मागणी नागरिकांमधून होत आहे. तसे केले नाही तर रस्त्यावर उतरू, असा इशारा नागरिकांनी दिला आहे.