व्यायामशाळेच्या अनुदानात दुपटीने वाढ

व्यायामशाळेच्या अनुदानात दुपटीने वाढ
सात ऐवजी मिळणार १४ लाख ; साहित्य खरेदीसाठी फायदा
सकाळ वृत्तसेवा
चिपळूण, ता. ७ : आता व्यायामशाळेच्या अनुदानात दुपटीने वाढ करण्यात आलेली आहे. यापूर्वी ७ लाख रुपयांचे अनुदान देण्यात येत होते. आता १४ लाख रुपये अनुदान दिले जाणार आहे.
राज्यात २०१२ मध्ये क्रीडा धोरण अमलात आले. यापूर्वी व्यायामशाळेसाठी दोन लाख रुपयांचे अनुदान दिले जात होते. हे अनुदान तोकडे असल्याच्या तक्रारी, विनंती शासनाकडे प्राप्त झाल्या. त्यानंतर २०१९ मध्ये शासनाने यात वाढ करून अनुदानाची रक्कम ७ लाख रुपये केली होती. त्यानंतरही व्यायामशाळेत विविध साहित्यांची वाढती मागणी व दरामध्ये वाढ झाल्याने सदर अनुदान कमी पडत होते. अनुदानामध्ये वाढ करण्याची मागणी सातत्याने करण्यात येत होती. याची दखल घेऊन राज्यसरकारने अनुदानाची रक्कम ७ लाख रुपयांवरून १४ लाख रुपये केली. या संदर्भातील आदेश २३ एप्रिल २०२५ रोजी निर्गमित करण्यात आला.
---
अर्ज कोठे व कसा करायचा?
व्यायामशाळा उभारणीसाठी जिल्हा क्रीडाधिकारी कार्यालयाकडे अर्ज सादर करावा लागतो. तो अर्ज थेट जिल्हा क्रीडाधिकारी कार्यालय किंवा शक्य नसल्यास तालुका क्रीडाधिकारी कार्यालयातही सादर करता येतो.
---
निकष असे
व्यायामशाळा उभारणीसाठी योग्य व आवश्यक प्रमाणात जागा असावी. अंदाजपत्रक तयार करून ते सादर करावे लागते. व्यायामशाळा योग्यप्रकारे चालवण्याबाबतचे हमीपत्र आवश्यक.
------
कोट
उत्कृष्ट खेळाडू निर्मितीसाठी व्यायामशाळा आवश्यक आहेत. आता तर शासनाने व्यायामशाळेसाठी १४ लाख रुपयांपर्यंत अनुदान वाढवले आहे. व्यायामशाळा मंजुरीसाठी इच्छुकांनी विहित नमुन्यात प्रस्ताव जिल्हा क्रीडाधिकारी कार्यालयाला सादर करावे.
- शेखर निकम, आमदार, चिपळूण