-जिवंत सातबारा मोहिमेत ६२४ अर्ज

जिवंत सातबारा मोहिमेत ६२४ अर्ज
राजापूर तालुका ; वारस नोंदणीचे काम गतिमान
सकाळ वृत्तसेवा
राजापूर, ता. ७ ः तालुक्यातील तहसील कार्यालयातर्फे शासनाची जिवंत सातबारा मोहीम प्रभावीपणे राबवली जात आहे. तालुक्यामध्ये एकूण ९७७ मृत खातेदार असून, या मोहिमेतंर्गत ६२४ अर्ज दाखल झाल्याची माहिती महसूल प्रशासनाकडून देण्यात आली. या मोहिमेतंर्गत ‘मृत’ सातबारा ‘जिवंत’च्या वाटेवर नेण्यासाठी महसूल प्रशासन गतीमान झाले आहे.
शासनाने राज्यभर एप्रिलपासून जिवंत सातबारा मोहीम सुरू केली आहे. या मोहिमेत मृत खातेदारांच्या वारसांची नावे लावून सातबारा जिवंत करण्याची प्रक्रिया सुरू केली आहे. पहिल्यांदा चावडीत मृत खातेदारांच्या सातबारांचे वाचन केले. त्यानंतर मृत खातेदारांच्या वारसांकडून कागदपत्रे संकलित केली. त्याची छाननी करून ई-हक्क प्रणालीत वारस नोंदीचे अर्ज दाखल केले. त्यानुसार निर्णयांचे ठराव घालण्यात आले. आता फेरफारसाठी गेलेले अर्ज मंजूर करण्यात येत आहेत. दुसऱ्‍या टप्प्यामध्ये जिवंत सातबारा मोहीम अधिक व्यापक करण्याचा निर्णय शासनातर्फे घेण्यात आला आहे. त्यामध्ये सातबारावरील कालबाह्य व अनावश्यक नोंदी कमी करण्यात येणार आहेत. अपाक, सावकारी नोंदी, विविध बोजा कमी करणे, नजर गहाण, सावकारी कर्ज नोंदी काढून टाकणे, कजापचा अंमल करणे, महिला वारस नोंदी आदी मुद्द्यांवर दुसऱ्या टप्प्यात कार्यवाही होणार असल्याचे सांगितले जात आहे. दरम्यान, येथील तहसीलदार विकास गंबरे यांच्या मार्गदर्शनाखाली शासनाची जिवंत सातबारा मोहीम महसूल प्रशासनातर्फे प्रभावीपणे राबवली जात आहे. दरम्यान, तालुक्यामध्ये एकूण मयत खातेदार ९७७ असून, ई-हक्क प्रणालीत १८८ वारस नोंद अर्ज दाखल झाले आहे. वारस नोंद अर्जानुसार वारस ठराव निर्णयसंख्या ६२४ करण्यात आली आहे. त्यामध्ये वारस फेरफारसाठी २७० प्रकरणे दाखल झाली असून, त्यापैकी ४८ प्रकरणे मंजूर झाल्याची माहिती महसूल प्रशासनाकडून देण्यात आली.