शिबिरांमुळे शारीरिक क्षमता वृद्धिंगत

62374

शिबिरांमुळे शारीरिक क्षमता वृद्धिंगत

रमाकांत राऊत ः खारेपाटणमध्ये क्रीडा शिबिराचा समारोप

सकाळ वृत्तसेवा
तळेरे, ता. ७ ः विद्यार्थ्यांच्या शारीरिक क्षमतेत वाढ होऊन आरोग्य चांगले राहण्यासाठी व व्यक्तिमत्व विकासाच्या दृष्टीने असे क्रीडा शिबिर आवश्यक आहे, असे प्रतिपादन माजी सरपंच रमाकांत राऊत यांनी खारेपाटण येथे क्रीडा शिबिर समारोप प्रसंगी केले.
खारेपाटण येथील सामाजिक कार्यकर्ते सतीश गुरव व संकेत शेट्ये यांच्यावतीने विविध गटातील शालेय विद्यार्थ्यांसाठी २५ एप्रिल ते ५ मे कालावधीत आयोजित केलेल्या उन्हाळी क्रीडा शिबिराचा समारोप नुकताच खारेपाटण येथील श्री देव केदारेश्वर मैदानाच्या पटांगणावर झाला. यावेळी श्री. राऊत यांनी मार्गदर्शन केले. व्यासपीठावर सतीश गुरव, संकेत शेट्ये यांसह खारेपाटण माजी सरपंच रमाकांत राऊत, खारेपाटण सोसायटीचे संचालक विजय देसाई, श्री देव कालभैरव-दुर्गादेवी मंदिर ट्रस्ट खारेपाटण अध्यक्ष मधुकर गुरव, सामाजिक कार्यकर्ते मंगेश गुरव, डॉ. उमेश बालन, अॅड. प्रमिला शेट्ये, वसीम मुकादम, बबलू बाबरदेसाई, तेजस राऊत, कांता झगडे, क्रीडाप्रशिक्षक अमोल चौगुले आदी उपस्थित होते.
यावेळी मित्रमंडळातर्फे मान्यवरांचे स्वागत करण्यात आले. ग्रामस्थांनी आयोजकांचे आभार मानून अशा प्रकारची शिबिरे प्रत्येक वर्षी घ्यावी, असे सुचवले. सलग १५ दिवस चालेल्या या शिबिरात व्हॉलीबॉल, क्रिकेट, सेपक टकराव, लेझिम, लाठीकाठी, मर्दानी खेळ, नृत्य आदी खेळ व कलांचा सराव विद्यार्थ्यांकडून घेण्यात आला. शिबिराच्या कालावधीत गारगोटी (जि. कोल्हापूर) येथील राष्ट्रीय व्हॉलीबॉल खेळाडू आदित्य पोवार व राहुल मोहिते यांचे विद्यार्थ्यांना विशेष मार्गदर्शन लाभले. शिबिरातील सर्व सहभागी विद्यार्थ्यांना आयोजकांकडून सहभाग प्रमाणपत्र व मेडल्स देऊन मान्यवरांच्या शुभहस्ते गौरविण्यात आले. या उन्हाळी क्रीडा शिबिरात एकूण ६५ विद्यार्थ्यांनी सहभाग घेतला. मंगेश गुरव यांनी आभार मानले.