पर्स, हँन्डपर्सचे प्रशिक्षण

महिलांसाठी पर्स, हँडपर्स
बनवण्याचे प्रशिक्षण
गुहागर ः तालुक्यातील बचतगटातील महिलांसाठी महाराष्ट्र राज्य ग्रामीण जीवनोन्नती अभियानांतर्गत (उमेद) प्रकृती फाउंडेशन व मर्म संस्था यांच्या संयुक्त विद्यमाने पर्स, पाऊच आणि सॅक तयार करण्याचे तीनदिवसीय प्रशिक्षण शृंगारतळी येथे पार पडले. गटविकास अधिकारी शेखर भिलारे यांच्या प्रेरणेतून तसेच प्रकृती फाउंडेशनच्या मिलन जंगम यांच्या संकल्पनेतून हा उपक्रम राबवण्यात आला होता. मेधा शहा तसेच मुग्धा देसाई (मुंबई) यांच्या अत्यंत उत्कृष्ट मार्गदर्शनामुळे महिलांना उत्तम प्रशिक्षण मिळाले, असे काही महिलांनी सांगितले.
---
मंडणगड शहरात
मॉकड्रील
मंडणगड ः मंडणगड शहरात अचानक बुधवारी (ता. ७) रोजी सायरन वाजला आणि नागरिक सतर्क झाले. सर्वांना मंडणगड पोलिसांमार्फत माहिती देण्यात आली होती. सध्या युद्धजन्य स्थितीत शत्रूकडून कोणतीही कारवाई झाली तशी परिस्थिती निर्माण झाल्यावर नागरिकांनी व यंत्रणेने काय करायचे या संदर्भात मॉकड्रील करण्यात आले. मॉकड्रीलसाठी ठरलेल्या वेळेनुसार सायरन वाजवला आणि लोकांना परिस्थितीविषयी सूचना दिल्या गेल्या. पोलिस आणि होमगार्डची टीम यांनी मॉकड्रीलमध्ये सहभाग नोंदवला. या वेळी पोलिस निरीक्षक नितीन गवारे यांनी युद्धजन्य परिस्थितीच्यावेळी नागरिकांनी काय करायला पाहिजे याच्या सूचना उपस्थित नागरिकांना समजावून सांगितल्या तसेच बैठक घेऊन कर्मचारी यांना मार्गदर्शन केले.