-चोरवणे येथे गरज नसताना साकव

चोरवणे येथे गरज नसताना साकव
सुधीर कांबळे ः चौकशीबाबत जिल्हाधिकाऱ्यांना निवेदन
सकाळ वृत्तसेवा
रत्नागिरी, ता. ८ ः नाणीज ग्रामपंचायत हद्दीतील नाणीज बौद्धवाडी ते चोरवणे येथे अनुसूचित जाती व नवबौद्ध घटकांच्या वस्तीमध्ये विशेष घटक योजनेतून नाणीज ग्रामपंचायतीने समाजकल्याण विभागाकडे प्रस्ताव मंजूर करून साकव बांधण्यात येत आहे. या साकवाची आवश्यकता नसताना हे बांधकाम केले जात आहे. याची चौकशी करावी, अशी मागणी सुधीर कांबळे यांनी निवेदनाद्वारे जिल्हाधिकाऱ्यांकडे करण्यात आली आहे.
हे निवेदन नाणीज बौद्धवाडी येथील सुधीर कांबळे यांनी दिले आहे. निवेदनात म्हटल्याप्रमाणे, ज्या वहाळावरती साकव बांधत आहेत त्या वहाळापलीकडे नाणीज बौद्धवाडीतील कोणत्याही अनुसूचित जाती घटकांची शेतजमीन नाही अथवा वावर नाही. पलिकडे संगमेश्वर तालुक्यातील चोरवणे गावची सोनारवाडी असून, चार ते पाच घरे आहेत. त्यांना ये-जा करण्यासाठी स्वतंत्र साकव हा आता बांधकाम होत असलेल्या साकव पुलापासून १०० फुटावर आहे. त्या वहाळाच्या दोन्ही बाजूने रस्ताही नाही. नालंदा बौद्धजन मंडळ नाणीज (स्थानिक व भारतीय) बौद्ध महासभा शाखा नाणीजच्यावतीने रस्ता झाल्यास व जमिनी रस्त्यासाठी दिल्या असल्यास पुलाचे बांधकाम मंजूर करण्याबाबत पत्र दिले आहे. नवबौद्ध वस्तीतून पलीकडे कोणाचीच शेतजमीन अथवा व्यवसाय नाही. वहाळापलीकडे लोकांना नाणीजमध्ये बाजारात येण्यासाठी पूर्वापार साकव व पायवाट रस्ता आजही उपलब्ध आहे तसेच चोरवणे बौद्धवाडी येथील समाजबांधवांना नाणीज बाजारपेठ अथवा महामार्गासाठी ये-जा करण्यासाठी जिल्हा परिषदअंतर्गत ग्रामीण मार्ग उपलब्ध आहे. या कामाची कोणतीही शहानिशा न करता प्रस्ताव कसा मंजूर केला, असा प्रश्नही उपस्थित केला आहे. गरज नसताना बांधण्यात येणारा हा साकव म्हणजे निधीचा गैरवापरच आहे. येथे आरसीसी साकव पुलाचा कोणताही उपयोग नाही, असे निवेदनात नमूद केले आहे.