स्वयंसहाय्यता बचत गटांना मिनी ट्रॅक्टर

स्वयंसहाय्यता बचतगटांना मिनी ट्रॅक्टर
अनुसूचित जाती व नवबौद्ध घटक; १० टक्के स्वतःचे तर ९० टक्के अनुदान
सकाळ वृत्तसेवा
रत्नागिरी, ता. ८ ः अनुसूचित जाती व नवबौद्ध घटकांच्या स्वयंसहाय्यता बचतगटांनी मिनी ट्रॅक्टर व त्याची उपसाधने यांचा पुरवठा करण्यासाठी लाभार्थ्यांकडून अर्ज समाजकल्याण विभागाकडून मागवण्यात आले आहेत. त्यासाठी आवश्यक प्रस्ताव समाजकल्याण कार्यालयाकडे सुपूर्द करावेत, असे आवाहन सहाय्यक आयुक्त दीपक घाटे यांनी केले आहे.
अनुसूचित जाती व नवबौद्ध घटकांच्या स्वयंसहाय्यता बचतगटांना मिनी ट्रॅक्टर व त्याची उपसाधने पुरवणे या योजनेत ९० टक्के अनुदानावर ९ ते १८ अश्वशक्तीचा मिनी ट्रॅक्टर व त्याची उपसाधने कल्टिव्हेटर किंवा रोटॅव्हेटर व ट्रेलर यांचा पुरवठा करण्याकरिता ही योजना सुरू करण्यात आली आहे. योजनेचा लाभ घेण्यासाठी स्वयंसहाय्यता बचतगटातील सदस्य हे महाराष्ट्राचे रहिवासी असावेत. त्याचप्रमाणे स्वयंसहाय्यता बचतगटातील किमान ८० टक्के सदस्य अनुसूचित जाती व नवबौद्ध घटकातील असावेत. स्वयंसहाय्यता बचतगटाचे अध्यक्ष व सचिव हे अनुसूचित जाती व नवबौद्ध घटकातील असावेत. मिनी ट्रॅक्टर व त्यांची उपसाधने यांच्या खरेदीची कमाल मर्यादा ३ लाख ५० हजार रुपये आहे. बचतगटांनी कमाल मर्यादेच्या १० टक्के हिस्सा स्वतः भरल्यानंतर ९० टक्के रक्कम म्हणजेच कमाल ३ लाख १५ हजार रुपये शासकीय अनुदान अनुज्ञेय राहील. बचतगटाचे राष्ट्रीयकृत बँकेत बचतगटाच्या नावे बँकखाते असावे व बँकखाते बचतगटाचे अध्यक्ष व सचिव यांच्या आधार क्रमांकाशी संलग्न असावे. पात्र स्वयंसहाय्यता बचतगटांना शासनाने उद्दिष्ट निश्चित केले आहे.