-पशुसंवर्धन विभागाकडून वैयक्तिक लाभाच्या योजना

‘पशुसंवर्धन’कडून वैयक्तीक लाभाच्या योजना
प्रस्तावासाठी १ जूनपर्यंत मुदत ; शेतकऱ्यांना स्वयंपूर्ण करण्याचा प्रयत्न
सकाळ वृत्तसेवा
रत्नागिरी, ता. ८ ः पशुसंवर्धन विभागांतर्गत विविध वैयक्तीक लाभाच्या योजनांचा लाभ घेण्यासाठी पशुपालक बांधव, सुशिक्षित बेरोजगार युवक-युवती व महिलांनी https://ah.mahabms.com या संकेतस्थळावर १ जूनपर्यंत अर्ज करावेत, असे आवाहन जिल्हा पशुसंवर्धन अधिकारी डॉ. आर. पी. नरूटे यांनी केले आहे. तसेच अँड्राईड मोबाईलधारकांसाठी गुगल प्ले स्टोअरवरून AH-MAHABMS मोबाईल ॲपसुद्धा उपलब्ध आहे.
नावीन्यपूर्ण राज्यस्तरीय व जिल्हास्तरीय योजनेअंतर्गत दुधाळ गाई-म्हशींचे गट वाटप करणे, शेळी-मेंढी गट वाटप करणे, १ हजार मांसल कुक्कुट पक्ष्यांच्या संगोपनाकरिता निवाराशेड उभारणीस अर्थसाहाय्य देणे, एकदिवसीय १०० कुक्कुट पिल्लांचे वाटप करणे या योजनांसाठी ऑनलाईन पद्धतीने लाभार्थी निवड प्रक्रिया २०२५-२६ या वर्षात राबवली जात आहे. पशुपालकांना डेअरी, पोल्ट्री किंवा शेळीपालन यापैकी ज्या बाबींमध्ये अर्ज करावयाचा आहे त्याची निवड करण्याची सुविधादेखील उपलब्ध करून देण्यात आली आहे. तालुक्यातील पशुपालक बांधव, सुशिक्षित बेरोजगार युवक-युवती, महिलांनी या योजनेचा लाभ घेण्यासाठी ऑनलाईन पद्धतीने अर्ज करावेत, असे आवाहन करण्यात आले आहे.
ग्रामीण भागातील सुशिक्षित व बेरोजगार युवकांसह पशुपालक व शेतकरी बांधवांना स्वयंरोजगाराचे साधन उपलब्ध करून देत त्यांना शाश्वत अर्थार्जनाचा पर्याय उपलब्ध करून देणाऱ्या पशुसंवर्धन विभागाने विविध योजना व उपक्रमाद्वारे ग्रामीण महाराष्ट्राचे अर्थचक्र गतीमान ठेवण्याचा नेहमीच प्रयत्न केला आहे.