योग चळवळीचा ग्रामीण भागातही विस्तार

swt95.jpg
62737
केरवडे तर्फ माणगाव ः येथे संयुक्त योगोपचार शिबिराचे उद्घाटन करताना शेखर बांदेकर, अर्जुन परब, राजू मुळीक आदी. (छायाचित्र ः अजय सावंत)

योग चळवळीचा ग्रामीण भागातही विस्तार
उपस्थितांमधून सूर ः केरवडे तर्फ माणगाव येथे उत्स्फूर्त प्रतिसाद
सकाळ वृत्तसेवा
कुडाळ, ता. ९ ः पतंजली योग समिती सिंधुदुर्ग यांच्यामार्फत केरवडेमधील जिल्हा परिषद पूर्ण प्राथमिक शाळा केरवडे तर्फ माणगाव येथे संयुक्त योगोपचार शिबिराचे उद्घाटन करण्यात आले. आता ही योग चळवळ शहरी भागातून ग्रामीण भागाकडे वळू लागली हे कौतुकास्पद आहे, असे प्रतिपादन मान्यवरांनी केले.
या शिबिराला उद्घाटक प्रमुख पाहुणे म्हणून केरवडे गावच्या सरपंच सौ. श्रिया ठाकूर आणि अध्यक्ष म्हणून पतंजलि योग समिती सिंधुदुर्ग जिल्हा प्रभारी शेखर बांदेकर हे लाभले. यावेळी उपसरपंच अर्जुन परब, डॉ. अशोक नाईक, राजेंद्र मुळीक, विलास परब, प्रशांत केरवडेकर, यशवंत नाईक, सावंतवाडी सोशल मीडिया तहसील प्रभारी लक्ष्मण पावसकर, जगन्नाथ प्रभू आदी मान्यवर उपस्थित होते. दिप प्रज्वलनाने शिबिराचे उद्घाटन झाल्यानंतर जिल्हाप्रभारी बांदेकर यांनी योगाभ्यास घेतला. सूर्यनमस्कार, योगासने, सुक्ष्म व्यायाम आणि प्राणायाम असा योगाभ्यास घेण्यात आला. शिबिराच्या पहिल्याच दिवशी जवळपास ८५ योगसाधकांची उपस्थिती होती.
सूत्रसंचालन महेश गावडे, प्रास्ताविक विलास परब व आभार सुधीर सावंत यांनी मानले. या शिबिरास केरवडेमधील योगाभ्यास प्रेमींनी तसेच आसपासच्या गावातील नागरिकांनी देखील सहभाग घेतला. जिल्हा परिषद पूर्ण प्राथमिक शाळा केरवडे तर्फ माणगाव कमिटीने या शिबिरासाठी लागणारे स्टेज, साउंड सिस्टीम आणि जागा मोफत उपलब्ध करून दिली. शिबिराच्या शुभारंभी नियमित योगसाधना करून स्वतःला सुंदर असे गिफ्ट देऊन आपले शरीर रोगमुक्त करूया, असा संकल्प योग वर्गात घेण्यात आला. शिबिर चालू असेपर्यंत संपूर्ण केरवडे व आजूबाजूच्या परिसरातील ग्रामस्थांनी या योगशिबिराचा लाभ घ्यावा, असे अध्यक्ष बांदेकर यांनी सांगितले.