मार्गताम्हानेतील पद्मावती नदीतील गाळ काढणार

पद्मावती नदीतील गाळ काढणार
लोकसहभागातून उभारला निधी ; पाणीटंचाईवर मात
सकाळ वृत्तसेवा
चिपळूण, ता. ११ ः तालुक्यातील मार्गताम्हाने पद्मावती नदीतील गाळ उपसा उपक्रमाला नुकतीच सुरुवात झाली. यासाठी ग्रामस्थांनी लोकसहभागातून निधी उभारला असून त्याला नामचे सहकार्य मिळाले आहे. वझर ते घाणेकरवाडी या दरम्यानचा गाळ उपसा करण्यात येणार आहे.
मार्गताम्हाने गावची पद्मावती नदी पूर्णतः गाळाने भरल्याने त्यादृष्टीने उपाययोजना करण्यासाठी व भविष्यात पाणीटंचाई भासू नये, पाणी पातळी वाढावी यासाठी हा गाळ उपसा उपक्रम हाती घेण्यात आला आहे. नाम फाऊंडेशन ६० टक्के तर लोकसहभाग ४० टक्के यातून निधी उभारण्यात आला आहे. विशेष म्हणजे मार्गताम्हाने गावातील सर्व वाड्या यामध्ये सहभागी असून मोठ्या प्रमाणात आर्थिक हातभार लागला आहे. माजी आमदार मधुकर चव्हाण, डॉ. विनय नातू, नगरसेवक विक्रांत चव्हाण, उद्योजक निलेश चव्हाण या दानशूरांचे मोठे आर्थिक सहकार्य लाभले आहे. या उपक्रमाचे उद्‍घाटन डॉ. विनय नातू, पद्मावती देवस्थानचे अध्यक्ष संदीप चव्हाण, नाम फाऊंडेशनचे समीर जानवळकर आदी ग्रामस्थ उपस्थित होते.