खोदलेल्या रस्त्यांवर खडीचा मुलामा

खोदलेल्या रस्त्यांवर खडीचा मुलामा
तात्पुरती मलमपट्टी ; खेडवासीयांमध्ये नाराजी
सकाळ वृत्तसेवा
खेड, ता. १३ : शहरातील नव्या जलवाहिनीसाठी ४३ कोटी रुपयांचा निधी मंजूर झाला आहे. या योजनेचे काम गेल्या पाच महिन्यांपासून त्या त्या प्रभागात युद्धपातळीवर सुरू आहे. नव्या जलवाहिनीसाठी खोदलेल्या रस्त्यांमुळे मार्गाची धूळदाण झाली असून, त्या मार्गावर फक्त खडीचाच मुलामा नगर प्रशासनाकडून देण्यात आला आहे. ही मलमपट्टी तकलादू असल्यामुळे पावसाळ्यात त्याचा त्रास वाहनचालकांसह पादचाऱ्यांना सहन करावा लागणार आहे.
पावसाळा काही दिवसांवर येऊन ठेपलेला आहे. यापूर्वी खोदलेला मार्ग कितपत सुस्थितीत येईल, याबाबत शंका व्यक्त केली जात आहे. शहराला सतावणारी पाणीसमस्या निकाली काढून नागरिकांना दिलासा देण्यासाठी महत्वाकांक्षी नवी नळपाणी योजना राबवण्यात येत आहे. त्यासाठी राज्यमंत्री योगेश कदम यांनी निधी उपलब्ध करून दिला आहे. त्या योजनेतील कामांना सुरुवातही झाली आहे. टंचाईची समस्या कायमस्वरूपी सुटण्याच्या हेतूने नागरिकांमधूनही समाधान व्यक्त केले जात आहे; मात्र नव्या जलवाहिनीसाठी खोदाई करताना रस्त्याची दूरवस्था झाली आहे. उन्हामुळे धुळीचे साम्राज्य पसरले असून, नागरिक अक्षरशः मेटाकुटीस आले आहेत. धुळीवर पाण्याचा फवारा मारण्याची तसदीही संबंधित ठेकेदाराकडून घेतली जात नाही. त्यामुळे नागरिकांमधून नाराजीचे सूर आळवले जात आहेत.
खेड शहरातील प्रत्येक प्रभागात नव्या जलवाहिनीसाठी पाईप टाकण्याचे काम वेगाने सुरू आहे. पाईप टाकल्यानंतर खोदलेला भाग पूर्णपणे बुजवून सुस्थितीत आणणे आवश्यक असतानाही त्यावर केवळ खडी पसरवण्यात येत आहे. पावसाळ्यात या मार्गाची दूरवस्था होणार आहे. पावसाळ्यापूर्वी खोदलेला मार्ग सुस्थितीत आणण्याच्यादृष्टीने संबंधित ठेकेदार कितपत पुढाकार घेईल याबाबत साशंकताच आहे. त्यामुळे पावसाळ्यात नागरिकांना नवा मनस्ताप सहन करावा लागण्याची शक्यता नाकारता येत नाही.