-अनिरुद्ध निकम यांनी घेतली शरद पवारांची भेट

अनिरूद्ध निकम यांनी घेतली
शरद पवार यांची भेट
सकाळ वृत्तसेवा
सावर्डे, ता. १३ : चिपळूण-संगमेश्वर विधानसभा मतदार संघाचे आमदार शेखर निकम यांचे सुपुत्र परदेशात जाऊन कृषी विषयात उच्च पदवी घेणारे अनिरूद्ध निकम यांनी माजी केंद्रीय कृषिमंत्री शरद पवार यांची भेट घेतली.
विधानसभा निवडणुकीपूर्वी राष्ट्रवादीत उभी फूट पडली आहे. अजित पवार राष्ट्रवादी काँग्रेसमधून बाहेर पडले. त्याचवेळी चिपळूण-संगमेश्वर विधानसभा मतदार संघाचे आमदार शेखर निकम हे अजित पवार यांच्यासोबत राहिले. परिणामी, २०२३च्या विधानसभा निवडणुकीत अजित पवार गट विरुद्ध शरद पवार गट राष्ट्रवादी असा सामना पाहायला मिळाला. विधानसभा निवडणुकीच्या तोंडावर अनिरूद्ध निकम यांनी अशीच शरद पवार यांची भेट घेतली होती; परंतु त्यावर ऑस्ट्रेलियातून कृषी विषयातील उच्च पदवी घेऊन आल्यानंतर या क्षेत्रातील जाणकार असलेल्या पवार यांचा आशीर्वाद घेण्यासाठी अनिरूद्ध निकम त्यांना भेटल्याचे सांगण्यात आले; परंतु रविवारी (ता. ११) अचानक सकाळी अनिरूद्ध निकम हे शरद पवार यांच्या मुंबईतील निवासस्थानी गेले होते. त्या वेळी स्वतः पवार यांनी अनिरूद्ध निकम यांना बोलावून घेतले, अशी चर्चा रंगली आहे; मात्र अनिरूद्ध निकम-शरद पवार या भेटीमुळे चिपळूण-संगमेश्वर मतदार संघातील राजकीय क्षेत्रात चर्चेला उधाण आले आहे.