माऊली मंडळाचे महिलांचे नमन

माऊली मंडळाच्या महिलांचे नमन
पहिलाच प्रयोग ; १७ कलाकारांचा सहभाग
सकाळ वृत्तसेवा
गुहागर, ता. १६ ः प्रत्येक क्षेत्रात महिला या पुरुषांच्या बरोबरीने कार्यरत आहेत. कोकणातील प्रसिध्द लोककला म्हणून ओळखल्या जाणाऱ्या नमनातही आता महिला दिसू लागल्या आहेत. आभार संस्था संचलित माऊली महिला नमन मंडळाने पुरुष पात्र विरहित हे नमन उभे केले आहे. या महिला नमन मंडळाचा प्रयोग आडिवरे येथे महाकाली देवस्थानामध्ये झाला. आतापर्यंत या महिला नमन मंडळाचे १६ प्रयोग रत्नागिरी जिल्हा तसेच मुंबईत सादर करण्यात आले आहेत. त्याला प्रेक्षकांचा भरपूर प्रतिसाद मिळत आहे.
माऊली महिला नमन मंडळ रत्नागिरी जिल्ह्यातील पहिले महिलांनीच सादर केलेले हे नमन आहे. पौराणिक ब्रह्मसत्य गण आणि भन्नाट विनोदी गौळणींनी नटलेले हे चौरंगी नमन आहे. महिला नमन मंडळाचे लेखक दिग्दर्शक नमनसम्राट यशवंत वाकडे, निर्माता साईनाथ नागवेकर, सुत्रधार वासुदेव वाघे, सागर मायंगडे यांच्या संकल्पनेतून हे नमन साकार झाले आहे. या महिला नमन मंडळामध्ये एकूण १७ महिला कलाकार सहभागी आहेत. प्रेरणा विलणकर, वेदा शेट्ये, सर्वता चव्हाण, रिमा देसाई, पूनम गोळपकर, शितल सकपाळ, माधवी पाटिल, समिक्षा वालम, आकांक्षा वायंगणकर, तन्वी नागवेकर, ज्योती कदम, रेश्मा शिंदे, विनया काळप, गीता भागवत, पूर्वा चव्हाण, रेखा खातू, अर्चना मयेकर यांचा समावेश आहे.