कोकणातील वृध्दांची सोयीसाठी मिलन वृध्दाश्रम

वृध्दांची सोयीसाठी मिलन वृध्दाश्रम
डॉ. पारकर ः एकटे असलेल्यांना आधार
सकाळ वृत्तसेवा
मंडणगड, ता. १६ ः आईकडून मिळालेली प्रेरणा व सहकार्यांच्या मदतीने कोकणातील वृध्दांची सोय मिलन वृध्दाश्रमाचे माध्यमातून केली जाणार आहे, असे डॉ. जलील पारकर यांनी सांगितले.
मिलन वृध्दाश्रमाच्या उद्‍घाटनप्रसंगी आयोजित कार्यक्रमात ते बोलत होते. ते म्हणाले, मी मुळचा कोकणातीलच आहे. कोकणातून रोजगारासाठी मुंबई व पुणे या महानगरांमध्ये मोठ्याप्रमाणात स्थलांतर झाले आहे. गावांतील घरे बंद आहेत. कुटुंबातील तरुण शहरात काम करतात आणि गावात वयोवृध्द माणसे एकटी राहतात. ही गंभीर बाब लक्षात घेतली. त्या वृध्दांना एकाकीपणाचे मोठे दुःख आहे, त्यांच्याकडे पाहण्यास कोणाला वेळ नाही. ही गोष्ट लक्षात घेऊन सहा एकरामध्ये टाकेडे या ठिकाणी मिलन वृध्दाश्रम उभा केला आहे. यामागे आईकडून मिळालेली प्रेरणा व माझ्या सर्व सहकार्यांनी दिलेली साथ अत्यंत मोलाची आहे. पुर्णपणे धर्मादाय तत्वावार टाकेडे येथे सहा एकर जागेत वृध्दाश्रम तयार केला आहे. यामध्ये वयोवृध्दांना येणाऱ्या सर्व समस्या लक्षात घेऊन तीन वर्षे काम करुन वातानुकूलीत आश्रम उभा राहीला आहे. येथील नैसर्गरम्य वातावरणात आंबा, काजू, नारळ, केळी, सिताफळ यांची ७५० झाडे तसेच अनेक फुलझाडे लावून त्यांचे जतन केले आहे. वयोवृध्दांचे येथील आयुष्य सुखकर करण्याचा प्रयत्न केला आहे. याकामी हेबीटॅट फॉर ह्युमॅनिटी फाऊंडशनचे डॉ. आसिफ भोजानी, अॅड. उल्हास नाईक, वजाहद खान-देशमुख यांच्यासह फाऊंडेशनचे सर्व सभासद, कुटुंबीय, येथील ग्रामपंचायत व ग्रामस्थ यांचे सहकार्य लाभले आहे. प्रथम येणाऱ्यास आश्रमात प्रथम प्राधान्य दिले जाणार आहे येथे राहण्यासाठी वृध्दांकडून कोणतेही शुल्क आकरण्यात येणार नाही, त्यांनी सांगितले. परदेशी वा अन्यत्र राहणाऱ्या अपत्यांकडून आश्रमाचे कामात त्यांचे इच्छेने आलेल्या मदती स्विकारुन ती आश्रमाचे कामासाठी वापरणार असल्याचेही त्यांनी सांगितले.