रत्नागिरीत आज रायसोनी स्मृती बुद्धीबळ निवड चाचणी

रत्नागिरीत आज रायसोनी स्मृती
जिल्हा बुद्धिबळ निवड स्पर्धा
सकाळ वृत्तसेवा
रत्नागिरी, ता. १६ : रत्नागिरी येथे शनिवारी (ता. १७) जी. एच. रायसोनी स्मृती रत्नागिरी जिल्हा बुद्धिबळ निवड स्पर्धा ९ व १५ वर्षाखालील गटासाठी आयोजित करण्यात आली आहे. ही स्पर्धा रत्नागिरी जिल्हा बुद्धिबळ संघटनेने आयोजित केली आहे. रा. भा. शिर्के प्रशालेत सकाळी १० वाजता स्पर्धा सुरू होणार आहे.
विजेत्यांना आकर्षक पारितोषिके दिली जाणार आहेत. ९ वर्षांखालील खुला गट व मुलींचा गट प्रत्येकी प्रथम ४०० रुपये, द्वितीय ३०० रुपये आणि चषक, १५ वर्षांखालील खुला गट व मुलींचा गट प्रत्येकी प्रथम ४०० रुपये, द्वितीय ३०० रुपये, तृतीय आणि चतुर्थ प्रत्येकी २०० रुपये आणि चषक आणि उत्तेजनार्थ ११, १२ आणि १३ वर्षांखालील मुले व मुली यांच्या वयोगटात प्रत्येकी एक चषक दिला जाईल. ९ वर्षांखालील स्पर्धेत रत्नागिरी जिल्ह्यातील १.१.२०१६ नंतर जन्मलेले व १५ वर्षांखालील स्पर्धेत १.१.२०१० पासूनची जन्मतारीख असलेले सर्व खेळाडू सहभागी होऊ शकतात.
स्पर्धा स्विस लीग पद्धतीने खेळवली जाईल. एकूण फेऱ्यांची संख्या स्पर्धकांच्या सहभागावर ठरविण्यात येईल. ९ वर्षांखालील गटात २ मुले व २ मुली व १५ वर्षांखालील गटात ४ मुले व ४ मुली यांची निवड राज्य अजिंक्यपद स्पर्धेसाठी करण्यात येईल. निवड झालेले खेळाडू राज्यस्तरीय स्पर्धेत सहभागी झाल्यास त्यांच्या प्रवेश शुल्काचा परतावा जिल्हा संघटनेमार्फत दिला जाईल. तेथील राहण्याची व्यवस्था डॉर्मिटरी स्वरूपात राज्य निवड स्पर्धेचे आयोजक मोफत करतील.