...अन्यथा तुमची ओळख ‘राणे विरोधक’ इतकीच

64420
...अन्यथा तुमची ओळख
‘राणे विरोधक’इतकीच

नीलेश राणे ः वैभव नाईक यांच्यावर टीका

सकाळ वृत्तसेवा
कुडाळ, ता. १७ ः माजी आमदार वैभव नाईक हे सिंधुदुर्ग जिल्ह्याचे दुसरे परशुराम उपरकर बनायच्या दिशेने वाटचाल करत आहेत. त्यांनी काहीतरी नवीन निर्माण करावे. स्वतःच्या खिशात हात घालून सिंधुदुर्गासाठी काहीतरी निर्माण करा. केवळ तोंडाच्या वाफा सोडून तुम्ही केवळ ‘उपरकर’ होऊ शकता. लोक तुमचे नाव लक्षात ठेवतील असे कार्य उभे करा; अन्यथा तुमची ओळख राणेंचे विरोधक म्हणूनच राहील, अशा आशयाचे पत्रक कुडाळ विधानसभा मतदारसंघाचे आमदार नीलेश राणे यांनी प्रसिद्धीस दिले आहे.
प्रसिद्धी पत्रकात आमदार नीलेश राणे यांनी नमूद केले आहे की, ‘‘आपल्यातील अनेकांना माहीत नसेल की परशुराम उपरकर म्हणजे कोण? माजी केंद्रीय मंत्री तथा विद्यमान खासदार नारायण राणे यांच्यासोबत राहून उद्धव ठाकरेंना टीप देणारे हे शिवसैनिक होते. त्यानंतर राणे यांनी शिवसेना सोडली, तेव्हाच्या पोटनिवडणुकीमध्ये या उपरकरांचे डिपॉझिट जप्त झाले होते. उद्धव ठाकरेंनी उपरकरांना विधान परिषद दिली; मात्र त्यानंतर ते मनसेत गेले. मनसेमध्ये गटबाजी केली, राज ठाकरे यांनी कार्यकारिणी बरखास्त करून यांची हकालपट्टी केली. मग ठाकरे शिवसेनेत गेले आणि आज साधी ग्रामपंचायत निवडणूक लढू शकत नाहीत, अशी राजकीय अवस्था परशुराम उपरकरांची झाली आहे. यांचा एकच छंद म्हणजे राणे परिवारावर टीका करायची.’’
-------
उपरकरांच्या पावलांवर पाऊल
‘‘आज बघायला गेलं तर रिकामटेकडे असलेले वैभव नाईक हे उपरकर यांच्या पावलांवर पाऊल ठेवून वाटचाल करत आहेत. वैभव नाईक, काहीतरी नवीन निर्माण करा. स्वतःच्या खिशात हात घाला आणि सिंधुदुर्गासाठी काहीतरी निर्माण करा. तोंडाच्या वाफा सोडून तुम्ही केवळ परशुराम उपरकर होऊ शकता. लोक तुमचे नाव लक्षात ठेवतील, असे काहीतरी कार्य उभे करा; अन्यथा तुमची ओळख राणेंचे विरोधक म्हणूनच राहील,’’ असे राणेंच्या प्रसिद्धीपत्रकात नमूद आहे.