ःकृषि सहाय्यकांचे काम बंद आंदोलन

-rat१९p१६.jpg-
OP२५N६४८०६
चिपळूण ः कृषी सहाय्यक संघटनेने केलेल्या आंदोलनात मार्गदर्शन करताना कृषी सहाय्यक दादासाहब खारतोडे.
-------
कृषी सहाय्यकांचे काम बंद आंदोलन
मागण्यांकडे दुर्लक्ष : योजना अंमलबजावणीत अडचणी
सकाळ वृत्तसेवा
चिपळूण, ता. १९ ः कृषी विभागाच्या होऊ घातलेल्या आकृतीबंधामध्ये कृषी सहाय्यकांच्या पदोन्नतीची कुंठीत अवस्था दूर करण्यात यावी, या प्रमुख मागणीसह इतर मागण्यांकडे लक्ष वेधण्यासाठी कृषी सहाय्यक संघटनेने काम बंद आंदोलन सुरू केले आहे. पावसाळ्याच्या तोंडवर आंदोलन सुरू झाल्याने शेतकऱ्यांसाठी असलेल्या विविध योजनांच्या अंमलबजावणीस त्याचा मोठा फटका बसू लागला आहे.
सध्या कृषी सहाय्यकांचे एकूण ११ हजार ५२७ पदे अस्तित्वात असून, कृषी पर्यवेक्षकांची ७०० पदे मंजूर आहेत. त्यामुळे कृषी सहाय्यकांना सेवेचे २० ते २५ वर्षे झाल्यानंतरही पदोन्नती मिळत नाही. सध्या स्थितीमध्ये कृषी सहाय्यक व पर्यवेक्षक यांचे प्रमाण ६:१ याप्रमाणे आहे ते ४:१ याप्रमाणे करण्यात येणे आवश्यक आहे. त्यामुळे कृषी सहाय्यकांची पदोन्नतीची कुंठीत अवस्था दूर होऊन त्यांना पदोन्नतीच्या संधी उपलब्ध होतील. या मागणीसाठी व कृषी सहाय्यक यांना प्रत्यक्ष प्रक्षेत्रावर कामकाज करत असताना उद्भवणाऱ्या विविध अडचणींची सोडवणूक करण्यात यावी यासाठी कृषी सहाय्यक संघटनेने ऐन खरिपाच्या तोंडावर आक्रमक आंदोलनाची भूमिका घेतली आहे. कृषी सहाय्यक संवर्गाच्या विविध अडचणींसंदर्भात संघटनेने वेळोवेळी शासनदरबारी निवेदने देत अडचणी सोडवण्याची मागणी केली आहे. कृषी सहाय्यक ते कृषी पर्यवेक्षक यांचे प्रमाण ४:१ याप्रमाणे करण्यात यावे, कृषी सहाय्यक संवर्गाचे पदनाम बदलून सहाय्यक कृषी अधिकारी करण्यात यावे. कृषीसेवक कालावधी रद्द करून कृषी सहाय्यकांना नियमित कृषी सहाय्यक पदाचे आदेश देण्यात यावेत. कृषी विभागांमध्ये वाढत्या ऑनलाईन कामकाजाचा व्याप लक्षात घेता कृषी सहाय्यकांना लॅपटॉप उपलब्ध करून देण्यात यावेत, कृषी सहाय्यकांना कायमस्वरूपी मदतनीस देण्यात यावा, कृषिनिविष्ठा वाटपामध्ये सुसूत्रता आणावी, अशा विविध मागण्या व अडचणींसाठी संघटनेने काम बंद आंदोलन सुरू ठेवले आहे. क्षेत्रीय पातळीवर काम करताना कृषी सहाय्यकांना विविध अडचणींना तोंड देत काम करावे लागत आहे. या अन्यायाविरोधात वरिष्ठ स्तरावरून कुठलीही दखल घेतली जात नाही, असे कृषी सहाय्यक संघटनेचे म्हणणे आहे. त्यामुळे नाईलाजाने आंदोलनाची भूमिका घ्यावी लागत असल्याचे जिल्हाध्यक्ष विजय साळुंके व पदाधिकाऱ्यांनी सांगितले.
---
चौकट
कृषिमंत्री कोकाटेंच्या घोषणा हवेत
पुणे येथील ९ एप्रिलला झालेल्या कृषी विभागाच्या कार्यशाळेत कृषीमंत्री माणिकराव कोकाटे यांनी कृषी सहाय्यकांना लॅपटॉप देणार, कृषी सहाय्यक संवर्गाचे पदनाम बदल करणार असल्याचे सांगितले होते; परंतु प्रत्यक्षात या घोषणा हवेत विरल्या आहेत.