प्रलंबित मागण्यांकडे शासन लक्ष देईना

64854

प्रलंबित मागण्यांकडे शासन लक्ष देईना

कृषी सहायकांची व्यथा; सिंधुदुर्गनगरीत छेडले धरणे आंदोलन

सकाळ वृत्तसेवा
सिंधुदुर्गनगरी, ता. १९ ः कृषी सहायकांच्या विविध प्रलंबित मागण्यांच्या पूर्ततेसाठी महाराष्ट्र राज्य कृषी सहाय्यक संघटना सिंधुदुर्गतर्फे आज अधीक्षक कृषी कार्यालयासमोर धरणे आंदोलन करण्यात आले.
कृषी सहायकांच्या विविध प्रलंबित मागण्यांबाबत संघटनेतर्फे अनेकदा प्रशासनाचे लक्ष वेधले असतानाही मागण्या पूर्ण न झाल्याने आज महाराष्ट्र राज्य कृषी सहाय्यक संघटना शाखा सिंधुदुर्गतर्फे सिंधुदुर्गनगरी येथील अधीक्षक कृषी कार्यालयासमोर जिल्ह्यातील कृषी सहायकांनी सकाळपासून धरणे आंदोलन केले. कृषी सहाय्यक संघटनेचे अध्यक्ष बालाजी वाघमोडे, सचिव अमृता राणे यांच्या नेतृत्वाखाली केलेल्या या आंदोलनात राज्य कार्यकारिणी सदस्य चंद्रशेखर कदम, संघटनेचे पदाधिकारी गणेश राठोड, पुनम कोलते, लाडू जाधव, साक्षी बांदेकर यांच्यासह जिल्ह्यातील कृषी सहायक सहभागी झाले होते. या आंदोलनाच्या माध्यमातून जिल्हा अधीक्षक कृषी अधिकाऱ्यांना दिलेल्या निवेदनातून त्यांनी आपल्या विविध प्रलंबित मागण्यांकडे लक्ष वेधले. यामध्ये कृषी सेवक कालावधी रद्द करून कृषी सेवकांना नियमित कृषी सहाय्यक पदावर नियुक्ती द्यावी, कृषी सहायकांचे पदनाम बदलून सहाय्यक कृषी अधिकारी करणे, कृषी विभागातील संपूर्ण कामकाज डिजिटल स्वरूपात होत असल्याने कृषी सहाय्यकांना लॅपटॉप द्यावा, ग्रामस्तरावर कामकाजासाठी कृषी मदतनीस द्यावा, कृषी विभागाच्या आकृती बंधास तात्काळ मंजुरी द्यावी व त्यामध्ये कृषी पर्यवेक्षक यांची पदे वाढवून कृषी सहायकांच्या पदोन्नतीतील त्रुटी दूर कराव्यात, या प्रमुख मागण्यांसह विविध मागण्यांकडे अधीक्षक कृषी अधिकाऱ्यांचे लक्ष वेधले.
--------------
...अन्यथा खरीप हंगाम निविष्ठा वाटपावर बहिष्कार
कृषी निविष्ठा वाटपा संदर्भात वारंवार निवेदन देऊनही त्यामध्ये सुसूत्रता येत नसून कृषी सहायकांना वाहतूक भाड्यापोटी आर्थिक भार सहन करावा लागत आहे. तरी मार्गदर्शक सूचनेमध्ये विविध योजनेत कृषी सहायकांना वाहतूक भाड्याची तरतूद करावी किंवा निविष्ठा वाटप परमिटद्वारे करावे; अन्यथा खरीप हंगाममधील निविष्ठा वाटपावर संघटनेचा बहिष्कार असेल, असा इशारा या निवेदनाद्वारे कृषी सहाय्यक संघटनेचे अध्यक्ष बालाजी वाघमोडे यांनी प्रशासनास दिला आहे.