तहसीलदारांकडून विशेष शिबिर

ज्येष्ठ नागरिकांना रेशनकार्डासाठी
तहसीलदारांकडून विशेष शिबिर
सकाळ वृत्तसेवा
रत्नागिरी, ता. १९ : ज्येष्ठ नागरिकांच्या रेशनकार्डचे डिजिटलाझेशन अद्याप प्रलंबित आहे. त्यामुळे अनेक ज्येष्ठ शासनाच्या योजनांपासून वंचित राहिले आहेत. त्याकरिता रत्नागिरी शहर ज्येष्ठ नागरिक संघाने येत्या गुरूवारी (ता. २२) विशेष शिबिराचे आयोजन तहसील कार्यालयाच्या माध्यमातून केले आहे.
हे शिबिर २२ मे रोजी सकाळी १० ते दुपारी १ वाजेपर्यंत रत्नागिरी शहर ज्येष्ठ नागरिक संघाच्या शिवाजीनगर (नरहर वसाहत) येथील सभागृहात होणार आहे. रेशनकार्ड १२ अंकी झाल्याशिवाय केंद्र व राज्यशासनाच्या विविध योजनाचा आर्थिक लाभ मिळण्यापासून अनेक ज्येष्ठ नागरिक वंचित आहेत. या कामासाठी तहसीलदार कार्यालयात वारंवार जाणे टाळण्यासाठी ज्येष्ठ नागरिक संघाचे अध्यक्ष सुभाष थरवळ व शिष्टमंडळाने जिल्हाधिकाऱ्यांची भेट घेऊन वस्तुस्थिती त्यांच्या नजरेला आणून दिली. या कामाला गती येऊन ज्येष्ठ नागरिकांची सोय करण्यासाठी ज्यांना या सेवेचा लाभ घ्यावयाचा आहे त्यांनी आपल्यासोबत कागदपत्रांच्या झेरॉक्स प्रती घेऊन उपस्थित राहावे.
ही सुविधा संघाच्या सभासदांना तसेच अन्य ज्येष्ठ नागरिकांनाही उपलब्ध आहे. ज्येष्ठ नागरिकांनी आपल्यासोबत रेशनकार्ड, रेशनकार्डमध्ये असलेल्या सर्व सदस्यांची आधारकार्ड, गॅसनोंदणी पुस्तक, उत्पन्नाचा दाखला (असल्यास), कुटुंबामध्ये कोणी दिव्यांग असल्यास त्याचा दाखला घेऊन यावे, असे आवाहन रत्नागिरी शहर ज्येष्ठ नागरिक संघांचे अध्यक्ष सुभाष थरवळ यांनी केले आहे.