जीवरक्षकाच्या सतर्कतेमुळे बुडणाऱ्या मुलाचे वाचले प्राण

जीवरक्षकाच्या सतर्कतेमुळे
बुडणाऱ्या मुलाचे वाचले प्राण

म्हापण, ता. १९ ः खवणे किनारी समुद्रात स्नानासाठी उतरलेल्या १५ वर्षीय मुलाला जीवरक्षकाच्या प्रसंगावधानामुळे वाचविण्यात यश आले. ही घटना काल (ता.१८) सायंकाळी साडेसहाच्या सुमारास घडली. जीवरक्षक हनुमंत कोळंबकर यांच्या प्रसंगावधानाचे कौतुक होत आहे.
याबाबत अधिक माहिती अशी की ः सध्या मे महिन्याच्या सुट्टीमुळे खवणे समुद्रकिनारा पर्यटकांनी गजबजलेला आहे. ‘कायाकिंग’मुळे येथे प्रचंड प्रमाणात गर्दी होत आहे. काल सायंकाळी पावणे सातच्या सुमारास अनेक पर्यटक समुद्रात स्नान करत होते. यावेळी एक १५ वर्षीय मुलगा स्नानासाठी समुद्राच्या पाण्यात उतरला. समुद्रात काहीशा आतमध्ये गेल्यानंतर पाण्याचा अंदाज न आल्याने व वाळूत पाय रुतल्याने तो पाण्यात बुडू लागला. यावेळी त्याने मदतीसाठी जोरजोरात ओरडाओरड केली. हा प्रकार तेथे तैनात असलेल्या म्हापण ग्रामपंचायतीचे जीवरक्षक हनुमंत कोळंबकर यांच्या तसेच स्थानिक मच्छीमारांच्या लक्षात आला. त्यांनी तत्काळ धाव घेत त्या मुलास वाचवले व किनाऱ्यावर आणून प्रथमोपचार केले. जीवरक्षकाच्या प्रसंगावधानामुळे त्या मुलाला वाचविण्यात यश आले.
म्हापण ग्रामपंचायतीच्यावतीने मागील अनेक वर्षापासून खवणे समुद्रकिनाऱ्यावर पर्यटकांच्या सुरक्षिततेसाठी दोन जीवरक्षक नेमले आहेत. ग्रामपंचायतीच्या या पुढाकारामुळे ग्रामस्थ व पर्यटकांमधून कौतुक व्यक्त करण्यात येत आहे.