-केसरी नदीवरील कॉजवे दुरुस्तीच्या प्रतीक्षेत

- rat२०p७.jpg-
२५N६४९९०
दापोली - केसरी नदीवरील कॉजवे व रस्ता.
---
‘केसरी’वरील कॉजवे दुरुस्तीच्या प्रतीक्षेत
वाहतुकीत अडथळा ; दहा महिने झाले तरीही दुर्लक्ष
सकाळ वृत्तसेवा
दापोली, ता. २० ः इळणे आणि बोरथळ गावांना जोडणाऱ्या केसरी नदीवरील कॉजवेच्या दोन्ही बाजूकडील रस्त्यांची मागील पावसाळ्यात नदीला आलेल्या पुराने दूरवस्था झाली होती. रस्त्याची दूरवस्था होऊन दहा महिने उलटले तरीही वाहतुकीच्यादृष्टीने महत्वाचा असलेला रस्ता अजूनही दुरुस्तीच्या प्रतीक्षेत आहे.
दापोली तालुक्यातील इळणे पवई केसरी पंचक्रोशीतील इळणे येथून बोरथळला जाण्यासाठी केसरी नदीवर एक कॉजवे बांधण्यात आला होता. या कॉजवेचा दोन्ही बाजूकडील जोडरस्ता गतवर्षीच्या पावसाळ्यात नदीला आलेल्या पुराच्या पाण्याने वाहून गेला. अतिवृष्टीत वाहून गेलेल्या रस्त्याची १० महिन्यात सुधारणा करण्यात आली नसल्यामुळे कॉजवेच्या जोडरस्त्यावरील माती वाहून गेल्याने दगडधोंडे, खाचखळगे वाहतुकीस अडसर ठरत आहेत. इळणे गावाहून बोरथळ गावाकडे जाणाऱ्या या कॉजवेवरील मार्गामुळे इळणे तसेच वाघिवणे या गावातील लोकांना आंजर्ले, देहेण, सुकोंडी, पाजपंढरी, हर्णै तसेच दापोली तालुका मुख्यालयाकडे जाण्यासाठीचा हा सर्वात जवळचा मार्ग आहे. त्याशिवाय शेतीच्या कामासाठी जाण्यासाठीसुद्धा येथील शेतकऱ्यांना हा सोयीचा मार्ग आहे; मात्र जिल्हा परिषद बांधकाम विभागाला नागरिकांच्या सोयीसाठी या रस्त्याची सुधारणा करण्यास १० महिन्याचा कालावधी अपुरा ठरत आहे. गतिमान सरकारचे कृतिशील सुशासन म्हणून शेकी मिरवणाऱ्या राज्यकर्ते आणि प्रशासनकर्त्यांना रस्त्याची सुधारणा करण्याचा विसर पडल्याने पावसाळ्यात हा मार्ग धोक्याची घंटा ठरणार आहे.
---