राजापूर-नाले, गटारांची पावसाळ्यापूर्वी साफसफाई करा

rat20p19.jpg-
65033
राजापूर ः आढावा बैठकीमध्ये नगरपालिका प्रशासनाशी चर्चा करताना आमदार किरण सामंत.
----------

नाले, गटारांची पावसाळ्यापूर्वी साफसफाई करा
राजापुरात आढावा बैठक : आमदार किरण सामंतांकडून सूचना
सकाळ वृत्तसेवा
राजापूर, ता. २० : राजापूर शहरामध्ये निश्‍चित करण्यात आलेल्या पूररेषेबाबत नागरिकांच्या तक्रारी आहेत. त्यामुळे पूररेषेबाबत पाठवलेला अहवाल नागरिकांना विश्वासात घेऊन पुन्हा करावा. संभाव्य पूरस्थिती लक्षात घेऊन शहरातील नाले, गटारांची पावसाळ्यापूर्वी साफसफाई करण्यात यावी, अशी सूचना आमदार किरण सामंत यांनी नैसर्गिक आपत्ती आढावा बैठकीमध्ये नगरपालिका प्रशासनाला केली. सर्व शासकीय विभागांचा आढावा घेताना प्रशासनाला धारेवर धरले. पावसाळ्यामध्ये तालुक्यातील नागरिकांना त्रास झालेला खपवून घेतला जाणार नसल्याचा इशाराही दिला.
आमदार किरण सामंत यांच्या अध्यक्षतेखाली संभाव्य नैसर्गिक आपत्तीच्या पार्श्वभूमीवर येथील तहसील कार्यालयामध्ये मान्सून आढावा बैठक झाली. या वेळी तहसीलदार विकास गंबरे, गटविकास अधिकारी नीलेश जगताप, पोलिस निरीक्षक अश्वनाथ खेडकर, अशपाक हाजू, विलास चाळके, राजू कुरूप तसेच सर्व विभागाचे प्रमुख अधिकारी उपस्थित होते. या वेळी आमदार सामंत यांनी विभागवार आढावा घेतला. शहरामध्ये दरवर्षी सातत्याने राहणाऱ्या पूरस्थितीच्या अनुषंगाने जलसंपदा विभागाने पूररेषा निश्‍चित केली असून, त्याबाबत लोकांकडून नाराजीचा सूर उमटत आहे.
याबाबत आढावा बैठकीमध्ये चर्चा करताना आमदार सामंत यांनी राजापूर शहरातील पूररेषेबाबत नागरिकांना विश्वासात घेऊन काम करण्याच्या सूचना पालिका प्रशासनाला करताना पूररेषेबाबत पाठवण्यात आलेला अहवाल नागरिकांना विश्वासात घेऊन पुन्हा तयार करण्याचे सूचित केले. पावसाळ्यातील संभाव्य पूरस्थितीच्या अनुषंगाने पालिका हद्दीतील गटारे, मोऱ्या साफ करण्याच्या सूचना करताना पालिकेकडे असलेल्या बोटी अद्ययावत करून पूरस्थितीत वापरता येतील, याची तयारी करण्याचेही त्यांनी स्पष्ट केले. या वेळी आरोग्य, जलसंधारण, धरणे, दवाखाने, कृषी, जिल्हा परिषद रस्ते, सार्वजनिक बांधकाम रस्ते, पूल, महावितरण, वनविभाग, शाळा, धरणे, पर्यटनस्थळे अशा विविध विभागांचा आढावा घेण्यात आला.
मान्सून हंगामात तालुक्यातील नागरिकांना कोणताही त्रास होणार नाही किंवा कोणतीही हानी होणार नाही याची दक्षता घेत काम करण्याचे आदेश सर्व विभागांना देण्यात आले. मान्सूनच्या काळात प्रत्येक विभागाच्या कर्मचार्‍यांनी सतर्क राहण्याच्या सूचनाही आमदार सामंत यांनी दिल्या.